Amor e non acrobacias, The Homens regresa aos escenarios cunha data na Coruña

A noticia causou gran expectación entre os seguidores do grupo, que marcou unha época na escena independente de Galicia durante os anos 2000. Formado por Xocas (batería), LeRoi (baixo) e Martin Wu (guitarra e voz), o grupo compostelán foi un dos referentes do power pop en Galicia grazas á súa enerxía sobre o escenario, a forza das súas melodías e un son que mesturaba guitarras luminosas con letras cargadas de ironía e vitalidade.

The Homens deixou unha profunda pegada no panorama musical galego antes da súa retirada dos escenarios hai dez anos. O seu último disco publicouse hai dezaseis anos, un tempo no que os seus seguidores non deixaron de reivindicar o seu regreso. Agora, o grupo decidiu reencontrar co seu público recuperando a fórmula que os converteu nunha das bandas con máis quilómetros e máis seguidas do panorama galego do primeiro decenio do século XXI.

O regreso de The Homens comezou a xestar hai uns meses, cando LeRoi, Martin Wu e Xocas reuníronse por sorpresa na última edición do festival Psicotroita, onde ofreceron un directo moi celebrado e revisaron algúns dos seus temas máis emblemáticos. Aquel reencontro serviu para reavivar a química que sempre os caracterizou e foi o punto de partida desta nova etapa do trío compostelán.

A cita da Coruña será a primeira actuación en sala desta segunda etapa e marcará o inicio dunha xira de reencontro co público que os consolidou como banda de referencia no power pop en Galicia. O concerto do próximo 21 de novembro na Mardi Gras anúnciase como unha noite especial para o público nostálxico e para quen viviron o auxe da música alternativa galega de comezos de século. 

Cun repertorio que incluirá clásicos dos seus catro traballos discográficos e algunha sorpresa inédita, o grupo promete recuperar a enerxía e o espírito que sempre os acompañou.