Concerto solidario con Gaza con Mondra, Watani, Wöyza, Ruxe Ruxe e Monoulious DOP

O evento conta coa colaboración da Cátedra USC – Araguaney para o Diálogo entre Culturas e a Sociedade Xeral de Autores e Editores (#SGAE). Coa participación altruísta de artistas galegos de gran renome como Mondra, Monoulious DOP, Wöyza e Ruxe Ruxe, ademais do grupo de danza palestino Watani, a cita configúrase como un acto de apoio común á causa palestina.

Desde a Fundación Araguaney sublíñase que o obxectivo desta segunda edición é recadar fondos para reforzar á UNRWA, nun momento no que a axencia atravesa unha delicada situación económica. A pesar de que en 2024 a Unión Europea e o Estado español restableceron parte das súas achegas, a organización continúa gravemente infrafinanciada. A falta de recursos está a afectar á distribución de alimentos e medicamentos, e compromete a continuidade de servizos esenciais como a educación e a sanidade para millóns de refuxiados palestinos.

A Fundación advirte de que na Franxa de Gaza, devastada pola destrución de infraestruturas e con gran parte da poboación desprazada, a UNRWA segue sendo a única entidade humanitaria capaz de ofrecer unha resposta sostida e constante. Segundo remarcan os organizadores, este concerto solidario é un xesto artístico, cultural e social de Galicia para combater o abandono internacional da poboación refuxiada palestina.

As entradas e horarios

As entradas para o concerto xa se atopan dispoñibles por 15 euros máis gastos de xestión a través da páxina oficial da Sala Capitol. Tamén poden adquirir en Reixa Tenda (Rúa do Hórreo, 46) ou directamente no despacho de billetes da Sala Capitol o mesmo día do evento desde as 19:30 horas. As portas abriranse ás 19:45 horas, aínda que está prohibida a entrada a menores de 16 anos. 

A gala volverá reunir sobre o escenario a destacadas figuras da música galega xunto a unha representación artística palestina.

• Mondra, cantareiro e un dos grandes nomes da nova música galega, chega tras consolidar a súa proxección co seu segundo traballo discográfico, De Rolda (2025). Recoñecido pola súa innovación e frescura en estilos electrónicos e tradicionais, foi galardoado co Premio Martín Códax da Música e o Premio Mestre Mateo nos últimos anos.
• Wöyza, con máis de dúas décadas de carreira, é considerada unha das pioneiras do Hip Hop-Soul e RnB en Galicia e no Estado, cun percorrido internacional en cidades como Nova York, Zúric ou Lisboa. Recoñecida pola crítica como a “Lauryn Hill española”, a súa traxectoria fusiona soul, rap e música tradicional galega, e acompáñase de múltiples galardóns, entre eles os Premios Martín Códax en varias edicións.
• Ruxe Ruxe, a lonxeva banda de folk-punk galego, achegará a forza do seu son enérxico e comprometido. Con case tres décadas sobre os escenarios, a súa música defendeu sempre a liberdade creativa, a lingua e a identidade cultural galega.
• Monoulious DOP, nados como un fenómeno musical en internet en 2012, lograron conquistar ao público cunha proposta desenfadada, marcada pola súa conexión coas redes sociais e por espectáculos en directo cargados de humor e ritmo.
• Por último, actuará o grupo de danza palestino Watani, con sede en Madrid. Fundado en 2022, está composto por bailaríns de diferentes orixes e busca preservar e difundir a cultura palestina a través das súas danzas tradicionais, transmitindo unha mensaxe de fraternidad e resistencia cultural.

Os organizadores destacan que este concerto busca non só recadar fondos, senón tamén sensibilizar á cidadanía galega sobre a situación de millóns de refuxiados palestinos que dependen da axuda internacional. Ao mesmo tempo, reivindican o papel da cultura como ferramenta de resistencia e de transformación social, capaz de unir comunidades e de tender pontes entre realidades moi diferentes.