A Coruña descóbrese no Festival de Cine de San Sebastián como "o maior estudo de produción virtual de España"

O Festival de San Sebastián albergou este domingo a presentación, por parte da Deputación da Coruña e Pedralonga Estudos, do Coruña Estudo Inmersivo (CEI), "o maior estudo de produción virtual de España, chamado a liderar a nova xeración de producións audiovisuais en Europa".

O acto, celebrado no hotel María Cristina da capital donostiarra, contou coas intervencións do presidente da Deputación da Coruña, Valentín González Formoso, e do presidente do Clúster Audiovisual Galego (CLAG), Alfonso Blanco, ante responsables de plataformas e televisións como Netflix, Amazon Prime Vídeo, Movistar+, RTVE, Mediaset, Atresmedia, entre outras.

Durante a súa intervención, González Formoso destacou que o CEI "conecta dous sectores crave para o futuro de Galicia: o audiovisual e o tecnolóxico" e incidiu en que este proxecto "reforzará a capacidade de Galicia para atraer producións nacionais e internacionais".

"O CEI representa moito máis que unha aposta tecnolóxica, xa que é, sobre todo, unha gran aposta polo talento creativo de Galicia, na capacidade do seu sector audiovisual para reinventarse e buscar novas formas de contar historias que conectan co mundo", defendeu o presidente provincial.

Así mesmo, asegurou que "Galicia, e a provincia da Coruña en particular, contan cunha industria sólida, con produtoras valentes e profesionais altamente cualificados que levan anos creando contidos de éxito que conectan coa audiencia nacional e internacional".

Nesta liña, incidiu en que o CEI permitirá "dar un paso máis" ao situar a Galicia como "referente estatal e europeo en tecnoloxía de produción virtual". Pola súa banda, o presidente do Cluster Audiovisual Galego, Alfonso Blanco, subliñou que o impulso desta infraestrutura "beneficiará a toda a industria nacional de rodaxes e de produción".

A maiores, a presidenta de Pedralonga Estudos, Fernanda Tabarés, referiuse ás "vantaxes competitivas" do CEI, en concreto, debullou que esta conta cunha extensión total superior aos 2.000 metros cadrados nos que hai "un estudio virtual de 750 metros cadrados cunha 'led wall' de 28x6 metros e 1,9 pixel pitch de definición", así como recursos técnicos cos que o centro aspira a "#situar á vangarda da produción virtual europea".

Con todo, a Deputación detallou nunha nota de prensa que a esta infraestrutura sumaranse ao longo de 2026 dous novos estudios de 2.500 e 2.000 metros cadrados actualmente en construción, concibidos para "atender a produción audiovisual de maneira integral coa súa dotación de instalacións adicionais".