Abel Caballero anuncia a creación dun Museo da Historia de Vigo no Museo Verbum
"Queremos que (o museo) sexa un aceno máis da identidade e a autoestima da cidade", garante.
O alcalde de Vigo, Abel Caballero, anunciou este luns a reconversión do Museo Verbum (que actualmente se utiliza para congresos, reunións e outros encontros) na praia de Samil para convertelo en Museo da Historia de Vigo.
Segundo sinalou o rexedor en declaracións remitidas aos medios, o goberno local vai empezar os trámites para facer realidade este museo, no que se contará a historia de Vigo e os seus "grandes fitos".
O primeiro paso é a creación dunha "comisión de profesionais expertos" que está a traballar na redacción do proxecto e o próximo 31 de agosto comezará o desmonte do piso superior do edificio para a súa reforma integral.
Abel Caballero sinalou que a apertura do museo levará un tempo pero, mentres tanto, desenvolveranse actividades como exposicións temporais. "Queremos que (o museo) sexa un aceno máis da identidade e a autoestima da cidade", proclamou.
Escribe o teu comentario