As feiras do libro en Galicia pechan a tempada con boas cifras de asistencia e firmas

A tempada de feiras do libro en Galicia chega este fin de semana ao seu termo coa cita de Monforte, e péchaa con boas cifras de afluencia, tanto de público como de libreiros participantes, a falta do balance final.

Entre o 25 de abril e este 23 de agosto o sector desenvolveu eventos en 13 localidades galegas, e puido constatar que as feiras do libro seguen sendo cita obrigada para miles de lectores, segundo os datos que manexa a Federación de Librarías de Galicia.

Así, fontes do sector sinalan que este 2025 confirmouse unha maior afluencia de público tanto nas feiras grandes, como as que se celebraron nas cidades de Vigo e A Coruña, como tamén en feiras máis modestas, como en Rianxo, Viveiro ou Ponteareas.

No caso da cidade herculina, este ano a feira tivo que cambiar de localización, debido ás obras nos Cantóns, pero esta circunstancia non só non minguou as visitas (nesta edición, nos xardíns de Méndez Núñez), senón que as vendas aumentaron. "E tanto libreiros como visitantes comentaron que o espazo que se creaba era moi acolledor, e permitía mirar con moita máis calma e sen 'atascos' polo paso da xente", sinalaron desde a Federación.

Aínda que o reconto de vendas aínda non está pecho, a entidade estima que máis dun 81 % dos visitantes das feiras comprou algún libro.

"SACAR A LITERATURA Á RÚA" E "CREAR COMUNIDADE"
Fontes da Federación destacaron a Europa Press a importancia de eventos como as feiras, non tanto polo seu impacto económico no sector, senón por outros valores, como "sacar a literatura á rúa", captar novos públicos e "crear comunidade" entre lectores, autores e libreiros.

Deste xeito, explicaron que, aínda que as librarías galegas "han traballado moi ben ao seu público, que é habitual", teñen nas feiras a oportunidade de achegar a outros lectores que se interesan polas novidades editoriais e polas actividades organizadas nas librarías.

As feiras supoñen tamén unha oportunidade para as librarías pequenas para "ampliar a súa comunidade lectora", para estar presentes a través de actividades paralelas, #dar a coñecer máis aló do seu espazo e para establecer contactos con autores e con outros profesionais do sector.

EVOLUCIÓN NO TEMPO
Estes eventos, ademais, evolucionaron co tempo, aumentando a presenza de libreiros e o número e tipo de actividades paralelas. Deste xeito, buscáronse novos enfoques para facer máis atractivos os encontros fuxindo, por exemplo, das presentacións de libros ao uso, en favor dunha aposta máis próxima, con charlas de autores e entre autores.

No caso do público infantil, tamén cobrou cada vez máis relevancia, do mesmo xeito que ocorreu no espazo habitual das librarías. As feiras son unha cita case obrigada para as familias que gozan de contornas ao aire libre, con talleres e actos específicos, en época vacional, e os máis pequenos "responden", porque son "un público fantástico".

A Federación de Librarías aínda non realizou balance da tempada de feiras en canto ao número de asistentes (difícil de calcular dados os espazos onde se realizan e as dinámicas de paso) ou das vendas. En todo caso, si que se aventurou a sinalar que se manterá unha tendencia dos últimos anos: a venda de libros en galego, aínda sendo inferior aos libros en castelán, "pega un importante subidón".

UN "ECOSISTEMA DE UNIÓN"
"O imporante non é tanto a venda, que o é, porque todos os libreiros queren vender libros, senón tecer ese ecosistema de unión cos lectores e xerar dinámicas entre libros, autores, comunidade lectora e dos libreiros entre eles", insistiron fontes da organización.

A Federación de Librarías de Galicia, constituída en 1977, integra a uns 150 librarías da comunidade. Nas feiras do libro deste ano participaron máis de 80 librarías, editoriais, bibliotecas e institucións de Galicia.