Outro ano de marca no Resurrection Fest, por onde desfilaron máis de 141.000 festivaleros

Un total de 141.376 persoas asistiron ao Resurrection Fest, en Viveiro (Lugo), unha das edicións máis emblemáticas do festival, a vixésima, e "a mais multitudinaria até a data", segundo a organización, para a que se preparou un cartel de luxo, á altura do aniversario. O que é xa un referente internacional en música rock, metal, punk e hardcore reúne todos os anos centenares de bandas e nesta ocasión non defraudou tampouco.
 

O clima favoreceu ademais a celebración dun evento do que Concello e a organización sentiron moi orgullosos, xa que non se rexistraron practicamente incidencias e o cartel contou con numerosos artistas de primeira orde.

Xunto ás valoracións positivas, tampouco faltaron aquelas que sinalaron falta de aparcadoiros e de baños ou queixas pola seguridade debido ao elevado número de persoas no recinto.

Con todo, a organización, que o cualificou como "todo un éxito", xa está a preparar a seguinte edición, que xa ten datas, do 1 ao 4 de xullo de 2026.
 

Unha espectacular sesión de fogos artificiais puxo fin na madrugada deste domingo a catro tardes de concertos en catro escenarios diferentes onde se puido escoitar o mellor de rock e do metal. Slipknot foron os encargados de baixar o pano ante un público vindo de 40 países, segundo os rexistros, que abarrotou Viveiro e que compartiu escenario con artistas destacados como Judas Priest, Till Lindemann, Korn, Skindred ou Falling Inreverse.

A hostalaría un ano máis se ocupou ao cento por cento, do mesmo xeito que as dúas zonas de acampadas previstas. Ademais, a maior parte das localidades máis próximas da Mariña, chegando mesmo até Vilalba, recibiron tamén a unha gran parte do público que non atopou acomodo en Viveiro.

En canto ao seu impacto económico, a falta de cifras oficiais, estímase que pode chegar até os 30 millóns de euros, en especial despois de xerar uns 1.500 empregos directos e 4.000 indirectos no sector da hostalaría, transporte, seguridade e servizos técnicos. Ademais, estiman que a repercusión en medios de comunicación supera os 25 millóns de euros.