A cidade de Porto Alegre acolle o mes do Camiño de Santiago con exposicións, conferencias e cine

A cidade brasileira de Porto Alegre acolle este xuño o Mes do Camiño de Santiago cunha programación que vai desde unha mostra fotográfica da ruta xacobea até ciclos de conferencias e cine sobre un dos máis importantes itinerarios de peregrinación, considerado como vertebrador de Europa.

O director de Turismo de Galicia, Xosé Merelles, viaxará ao país suramericano esta semana para participar nos distintos actos conmemorativos organizados con motivo desta celebración.

Concretamente, visitará a mostra 'Iacobus Gaudet. Os Camiños de Santiago en Galicia' e manterá varios encontros de traballo con autoridades locais e nacionais para abrir novas colaboracións na promoción turística en Brasil.

Ademais, visitará o Centro Español de Porto Alegre que antigamente tamén foi casa de galegos e reunirase cos responsables da Asociación de Amigos do Camiño de Santiago de Río Grande do Sul (ACASARGS) para intensificar os lazos de colaboración a favor da promoción xacobea.

O director de Turismo de Galicia tamén manterá encontros no Consulado Xeral de España e no Instituto Cervantes de Porto Alegre.