O Festival do Pasatempo regresa este 2025 con dous días de música en xullo
A organización anunciou a celebración do evento os días 27 e 28 de xullo cun cartel que descubrirán a semana que vén.
Respirábase certa inquietude en Betanzos. Nas últimas semanas moitos miraban o calendario e non sabían que datas marcar en vermello ou, si ao fina, non habería nada que celebrar no municipio. Pero a organización do Festival do Pasatempo non defraudou e un ano máis traerá o evento ao Parque do Pasatempo de Betanzos con concertos únicos en directo nunha nova edición desta cita, unha das máis esperadas do verán en Galicia.
UN CARTEL DE PRIMEIRO NIVEL
Por agora, PlayPlan, á fronte da organización, só asomou a patita e non descubriu máis que as datas para anotalas na nosa axenda e non faltar á festa que se celebrará os días 27 e 28 de xullo no lugar que xa todos sabemos.
O cartel está a punto, pero o festival resístese a dalo a coñecer, polo que haberá que esperar até as 12 horas do próximo martes 27 de maio, momento no que se descubrirán os nomes dos artistas que integrarán esta proposta que, asegurán, contará con "artistas de renome que levarán os seus espectáculos completos" á localidade coruñesa.
A promesa cumprirase si ou si se temos en conta que só na última edición pasaron por Betanzos Andrés Suárez, David Bustamente, Sabela ou Paula Matheus. Iván Ferreiro, Taburete, M Clan, Os Segredos, Prok, Califato 3/4 ou Bad Gyal tamén se deixaron ver en anos anteriores polo Parque do Pasatempo, deixando claro que os invitados a este emprazamento catalogado como Ben de Interese Cultural son sempre de primeira orde e con estilos para todos os gustos.
Escribe o teu comentario