Concerto de Alan Parsons na Coruña o 24 de xuño no Palacio da Ópera

O espectáculo 'Alan Parsons Live Project' chegará o próximo 24 de xuño á Coruña, dentro do ciclo 'Concertos do Xacobeo', segundo informaron o director de Turismo de Galicia, Xosé Merelles, e o concelleiro de Cultura e Turismo do Concello herculino, Gonzalo Castro.

"A Coruña é un escenario privilexiado dentro do panorama español e europeo", manifestou, na presentación, Merelles, quen destacou a colaboración institucional co consistorio para que a cidade teña este ano "unha das programacións máis completas de música de todos os estilos".
 

Así mesmo, avanzou que non descarta que se vaian incorporando novas figuras musicais "en datas próximas" a este ciclo, que inclúe "máis de 60 eventos entre concertos e festivais, dos cales 15 desenvólvense na Coruña".

Na mesma liña, o edil de Cultura recalcou o "compromiso" de ambas as administracións por "impulsar proxectos de calidade e envergadura que contribúan de forma decisiva a situar a nosa cidade e o conxunto do país a nivel internacional como referentes de eventos de primeira magnitude no ámbito musical".

Respecto ao cantante, dixo que se trata de "un referente absoluto do rock sinfónico que deixou un legado musical indiscutible", un artista que dota de "diversidade e calidade" a programación, incidiu. "É historia viva da música", insistiu.
 

As entradas para o espectáculo 'Alan Parsons Live Project. The show mus go on tour', que terá lugar no Palacio da Ópera a partir das 20.30 horas, saíron á venda este luns desde 45 euros. A súa anterior visita a Galicia foi en 2004 e tamén actuou na cidade herculina, nesa ocasión, no Coliseum.