"Leite de vaca": Unha novela do Camiño sobre o futuro da gandaría e o planeta

Este luns 20 de xaneiro, o veterinario e escritor Alfonso Raffin da Rega presentará a súa obra “Leite de vaca” na sala de Ámbito Cultural do Corte Inglés en Santiago de Compostela, ás 19:00 horas. Este libro, que combina ficción e análise crítica, expón reflexións sobre o presente e o futuro da gandaría, o cooperativismo e o medio rural.

No acto, Raffin estará acompañado por personalidades relevantes do sector agrario e veterinario, como Roberto García, secretario xeral de Unións Agrarias (UPA); Higinio Mougán, xerente da Unión de Cooperativas AGACA; e José Luís Benedito, presidente do Colexio de Veterinarios de Lugo.

Máis que un libro: unha crítica social e ambiental

“Leite de vaca” é máis que unha obra literaria; é unha sátira que atravesa temas fundamentais como a industria láctea galega, o cooperativismo, as tradicións culturais e os desafíos da sustentabilidade. A trama, que segue as vivencias dun veterinario francés na súa peregrinaxe polo Camiño de Santiago, explora desde unha óptica humorística e crítica as contradicións da humanidade, abarcando temas como o machismo e feminismo, a fe e o fanatismo, e as relacións entre distintas culturas e xeracións.

O libro, ademais, desvela aspectos descoñecidos sobre o papel da gandaría na crise climática, a emigración rural e os valores que sustentan ás comunidades agrícolas. Raffin utiliza o relato para convidar o lector a reflexionar sobre como as decisións globais afectan tanto ao medio ambiente como á seguridade alimentaria.

Unha traxectoria comprometida co medio rural e o planeta

Raffin da Rega non é alleo aos desafíos que describe na súa obra. De orixe franca-asturiano, a súa vida profesional abarca desde a apicultura até a alta dirección en multinacionais lácteas, pasando polo seu traballo na cooperativa Feiraco.

O autor tamén é coñecido polo seu activismo. Desde a súa participación en Veterinarios Sen Fronteiras (hoxe Xustiza Alimentaria) até a súa oposición aos biocombustibles, Raffin destacou como un firme defensor da seguridade alimentaria e do medio ambiente. Nos últimos anos, impulsou o uso de rumiantes para mitigar o cambio climático mediante a transhumancia e colaborou en proxectos globais, como o HICOV Project, destinado a acelerar a inmunización fronte a pandemias.