Barcelos prepárase para un fin de semana de música coa VIII Mostra Musical do Eixo Atlántico

Como cada ano, a Mostra Musical do Eixo Atlántico é unha oportunidade para que novos talentos mostren o seu virtuosismo musical ao mundo. Este ano, pola VIII Edición, o escenario escollido polo ente transfronteirizo é o de Barcelos, onde os días 13 e 14 de abril interpretaranse algunhas das pezas fundamentais dentro da música clásica e o jazz.

Trátase de xornadas abertas ao público e contarán con 375 participantes, con 32 solistas e 343 intepretes de ao redor dunha trintena de escolas de música e conservatorios de concellos que compoñen o Eixo Atlántico, como O Barco de Valdeorras, Ferrol, Santiago ou Ponteareas en Galicia, mentres que os músicos lusos chegarán desde Vila do Conde, Bragança, Gaia ou a propia Barcelos, entre outros. Os lugares escollidos nesta ocasión é o Auditório São Bento Menni e o Teatro Gil Vicente, durante o sábado.

O broche de ouro a este fin de semana de música porao a final da Mostra Musical o domingo 14, cun xurado profesional seleccionando aos gañadores para a posterior entrega de premios, onde o Coro de Barcelos interpretará 'Grandola Vila Morena' nun evento no que tamén se homenaxeará ao músico galego Joám Trillo, nacido en Negreira en 1942 e unha das figuras determinantes no referido á protección e promoción da música do país, ademais de ser lembrado polo seu papel á fronte da Xove Orquestra de Galicia.