A Filmoteca de Galicia proxectará fondos dixitalizados do Hub Audiovisual Galego

A Filmoteca de Galicia avanza no seu labor de recuperación, restauración e conservación do noso patrimonio audiovisual coa recente dixitalización de máis de 30 películas de diferentes xéneros e formatos, realiazada ao amparo do programa Hub Audiovisual da Xunta "co obxectivo de pór en valor e difundir o seu arquivo histórico".

Con tal fin, a programación que se desenvolve na Sala José Sellier da Coruña conta este ano cunha nova sección que, baixo a denominación 'Materiais para unha historia do cinema en Galicia', exhibe diferentes pezas do fondo da cinemateca, entre as que se atopan filmaciones de carácter industrial ou familiar, moitas veces anónimas, "pero de gran valor documental á hora de reconstruír a historia do cine galego".

No primeiro trimestre do ano, este novo apartado na carteleira da Filmoteca de Galicia centrouse nas dixitalizacións acometidas dentro do Hub Audiovisual, para as que se contou cun investimento de 107.000 euros no marco do eixo programa REACT-#UE do Fondo Europeo de Desenvolvemento Rexional (FEDER).

Destacan, entre elas, un grupo de 32 películas de 35mm e 16mm que no seu día xa foran recuperadas e restauradas pola entidade en soporte fílmico de acetato.

As filmaciones en 16mm correspóndense con 14 documentais datados entre 1929 e 1972, moitos deles rodados por Eligio González entre a emigración galega en Arxentina e por Manuel Arís en Galicia, con destino a poboación emigrante en América do Sur.

As 18 cintas de 35mm están datadas entre 1915 e 1966 e abarcan desde obras de ficción até distintas tipoloxías documentais: noticieros, gravacións industriais e tamén reportaxes dirixidas á emigración galega alén do Atlántico.

Nas primeiras sesións da sección, xa se compartiron co público algunhas destas restauracións, como a película muda 'A traxedia de Xirobio', filmada en 1930 por José Signo; o traballo que promocionaba a Tinturaría España de Santiago de Compostela en 1927; as pezas documentais que Eligio González rodou no Centro Galego de Bos Aires entre 1957 e 1961; e o filme 'Unha viaxe por Galicia', gravado entre 1953 e 1958 por Manuel Arís, galego emigrado en Montevideo.

Tamén se dá cabida a materiais que foron dixitalizados pola Filmoteca nos últimos anos, como os documentos fílmicos do arquivo de Navantia ou restauracións recentes, como é o caso de varias películas de José Ernesto Díaz-Noriega, figura esencial do cine amateur español e de gran influencia para toda unha xeración de cineastas galegos a partir de que, a finais dos anos 50, establecera a súa residencia na Coruña, onde levou a cabo gran parte da súa produción.