O FIV de Vilalba 2024 será máis grande: un novo escenario e actividades gratuítas para todos os públicos
A nova edición do festival celebrarase os días 26 e 27 de abril no municipio lucense con Dorian, Vinte e un, Grande Amore, Iván Ferreiro ou Nena Polaca como principais atractivos.
O festival FIV de Vilalba disporá dun novo escenario e ofrecerá múltiples actividades, a maioría de acceso libre, e dirixidas a todas as idades na súa nova edición, que se celebrará os días 26 e 27 de abril no municipio lucense.
Así, durante o mediodía do sábado 27, o Escenario Emprazadas, que se situará na praza de Santa María, contará cunha programación diversa. Á xa tradicional actuación da Banda de Música de Vilalba, súmase a sesión DJ de Grande Osso e o karaoke FIV Stars con Esteban.
De Ninghures súmase ao cartel do FIV 2024 co Concerto Vibra Mahou. Nun comunicado explican que a banda é unha das seleccionadas a través do acordo de colaboración establecido entre a cervexeira e a Fundación Paideia Galiza "para promover o talento e impulsar proxectos musicais incluídos dentro dos programas de aceleración promovidos pola fundación".
O escenario Vibra Mahou, que volve á Praza da Constitución, recibirá a artistas de renome do panorama independente musical. A noite do venres subirán ao escenario Dorian, Vinte e un, Grande Amore, Mondra, e como colofón á festa, estará Eme Dj.
Xa o sábado será a quenda de Iván Ferreiro, A Randeeira Asasina, Nena Polaca, Lontreira, Serial Killerz e Señora Dj.
Os abonos continúan á venda a un prezo de 45 euros (máis gastos de xestión) tras esgotar o tres primeiros tramos, así como as entradas por día, que se poden adquirir a través da páxina web.
Así mesmo, habilitáronse dúas zonas de acampada, no polideportivo do CEIP Mato Vizoso e no campo de fútbol Estadio Roca.
Neste último espazo aínda quedan reservas dispoñibles a través da páxina web até o 15 de abril ou até esgotar o número máximo de parcelas.
Escribe o teu comentario