Actores de dobraxe sairán ás rúas de Santiago para reclamar dereitos laborais
O colectivo ten un convenio que non se modifica desde o ano 2006
O colectivo de dobraxe de Galicia sairá ás rúas de Santiago de Compostela este domingo para denunciar a súa situación e "loitar polos seus dereitos", tendo en conta que ten un convenio que non se modifica desde o ano 2006.
Nos últimos 18 anos, lembra este colectivo, "non se subiu nin un céntimo, nin un IPC". Así, "por si isto fose pouco, cando traballan en castelán, as empreas pagan entre un 25% e un 38,4% menos" e, de "non aceptar estas condicións, serán vetados".
Estas e outras reclamacións son as que levan á asociación Artistas de Dobraxe Asociados (ADA) a saír ás rúas este domingo 17 de marzo, "cansados de que a patronal se negue a cumprir a lei".
A convocatoria de ADA, que conta co apoio dos sindicatos CIG, CC OO e UXT, partirá da Alameda de Santiago ás 12 horas para chegar até a Praza de Praterías, onde lerán o manifesto. Ademais, contan co respaldo da Asociación de Actores e Actrices de Galicia e recibiron o apoio público da cantante Guadi Galego, o chef Javier Olleros (Culler de Pau), o xornalista Gonzo e entidades como A Mesa pola Normalización Lingüística, segundo explican nun comunicado.
Escribe o teu comentario