Presentadas as novidades para a Semana Santa de Ferrol este 2024

A Xunta Xeral de Confrarías e Irmandades presentou esta mañá en rolda de prensa a Semana Santa de Ferrol 2024, a máis madrugadora desde hai anos, que se desenvolverá do 24 ao 31 de marzo. O presidente da Xunta, César Carreño, cedeu a palabra aos responsables de cada unha das cinco confrarías, que foron explicando as principais novidades desta edición. Entre elas cabe destacar a estrea dunha nova procesión da Mercé e o de dúas novas imaxes, a mercedaria do Noso Pai Xesús da Humildade no Bico de Xudas, e a de Xesús da Columna, da Confraría de Dolores, así como o cambio de escenario do Gozoso Encontro.

Como sempre a meteoroloxía será o último factor determinante do desenvolvemento dunha Semana Santa que cumpre dez anos co recoñecemento de Interese Turístico Internacional e que suma os esforzos de máis de 3.000 persoas, fundamentalmente confrades e músicos pero tamén outras moitas persoas involucradas na confección de hábitos, adorno de tronos, seguridade nos percorridos e un longo etcétera.

De novo retransmitiranse todas as procesións en directo, do mesmo xeito que o pregón que pronunciará a xornalista Marta Fernández Corral mañá, ás 20.00h, no teatro Jofre. Será o preámbulo dunha nova Semana Santa na que subxace a vontade dos confrades por abrir portas e compartir a súa forma de vivir esta celebración: poderemos ver a entronización da Nosa Señora dos Cativos na noite do Martes Santo e abriranse as portas do corralón de Dolores, sempre que sexa posible, para que os fieis poidan achegarse ás imaxes xa preparadas para saír en procesión.

Confraría de Dolores: o presidente da irmandade servita, José Ángel Vázquez, destacou a estrea, o Martes Santo, da nova imaxe do Noso Pai Xesús da Columna, obra do imaxineiro andaluz Fernando Murciano. A talla, sufragada con doazóns entre as que destacaron as dos portadores do Cristo da Misericordia, será bendicida mañá sábado, ás 18.00h, na concatedral de San Xiao.

A Confraría de Dolores tivo este ano máis de 100 novas altas coas que supera o milleiro de confrades. A irmandade máis grande e con maior número de procesións vai entregar as súas medallas de ouro este ano a Francisco Vázquez, exalcalde da Coruña e exembajador de España no Vaticano, e ao empresario Ignacio Rivera, presidente de Estrela Galicia. O acto de entrega destas distincións celebrarase o Xoves Santo, ás 19.15h no Casino Ferrolán.

José Ángel Vázquez aproveitou tamén para anunciar que a Confraría de Dolores realizará unha recollida de alimentos non perecedoiros en todas as sedes temporais que abren os seus terzos, para entregar ao finalizar a Semana Santa a unha organización solidaria. Como novidade, ademais, a irmandade ten a intención de abrir as portas do corralón cada tarde de 16.00 a 20.00h, na medida en que o permita a organización das procesións, para que o público poida contemplar as imaxes preparadas.

Confraría das Angustias: José Ramón Cancelo, o presidente da Confraría das Angustias, destacou unha novidade que seguramente vai notarse pouco nas procesións, pero que supuxo un esforzo importante para a entidade. Rehabilitáronse este ano o Cristo do Perdón e o Xacente, así como parte do trono de prata da Virxe das Angustias. Cambiáronse tamén, despois de 30 anos, os instrumentos da Banda de Tambores, Cornetas e Gaitas da Confraría.
 

Confraría da Mercé: Helena Pena, a irmá maior da confraría mercedaria, destacou a estrea do Noso Pai Xesús da Humildade no Bico de Xudas, a nova imaxe encargada á imaxineira gaditada Ana Rey. Esta tarde, ás 20.30h, vai ser presentada e bendicida na capela do Tirso. Este paso de misterio, formado por dúas figuras, quedará en veneración na capela o sábado -de 11.00 a 13.30 e de 17.00 a 19.00h- e o domingo –de 16.00 a 20.00h-.

A súa estrea será o Xoves Santo, nunha nova procesión que sairá ás 18.30h. Co novo paso e o novo desfile chegou tamén a creación dun terzo de Xesús da Humildade, que vestirá túnica de sarga branca e capuz e cíngulo de cor morada, sen bordados polo cariz humilde que asumirá. Desvelou tamén Helena Pena que a Confraría da Mercé vai abrir as portas a entronización de Nosa Señora dos Cativos na noite do Martes Santo. Trátase dun acto habitualmente íntimo e reservado a un pequeno grupo de confrades, que agora se abre “porque queremos que a Semana Santa non sexa só dos confrades, senón que sexa de Ferrol, e que quen o desexe poida estar e vivila como o facemos nós”. Será unha breve cerimonia que se desenvolverá no interior da capela mercedaria despois de que se retire no corralón de Dolores, a escasos metros, a procesión de Xesús atado á Columna e a Santísima Virxe da Esperanza.
 

Lembrou tamén Pena que mañá sábado, a partir das 12.30h, desenvolverase o Ensaio Solidario, no que se percorren varias rúas do centro cun trono baleiro que se vai enchendo con doazóns de alimentos non perecedoiros para Balrial. É, lembrou, a edición número 17 desta acción solidaria.

Irmandade do Santo Enterro: Antonio Sixto, desde hai pouco irmán maior do Santo Enterro, comentou que se vai a variar lixeiramente a escenografía da Cerimonia do Desencravo. Haberá dous lectores e o Cristo do Desencravo estará máis tempo só, na cruz, antes de que os confrades encargados se acheguen para descendelo. O obxectivo é darlle un pouco máis de protagonismo a esta imaxe antiquísima que, moi probablemente, terá que ser substituída en próximas cerimonias por unha réplica debido ao seu delicado estado.

A irmandade celebrará o Sábado de Paixón, 23 de marzo, ás 18.00h, a súa cerimonia do Recibimento e Xura de Regras, na que este ano se dará a benvida a 7 numerarios (cinco 3 de 3 mulleres e dous homes) e dous monaguillos, así como a un numerario máis que reingresa na entidade. Anunciou tamén Sixto que a capela-túmulo, que se montará na tarde do Mércores Santo permanecerá aberta aos fieis despois ata a procesión do Venres Santo. Cabe destacar que o Santo Enterro é a irmandade á que lle tocará protagonizar o cartel da Semana Santa de 2025.

Confraría da Soidade: non puido acudir á rolda de prensa o presidente da Soidade, José Evia, pero no seu lugar a confrade María Paz, integrante da Xunta de Goberno, destacou que este ano se cumpre o 75 aniversario da procesión do Cristo dos Navegantes e que con ese motivo a irmandade e a parroquia do Socorro organizaron unha serie de actos. Entre outras cousas, o Luns Santo, ás 19.00 horas, celebrarase unha conferencia sobre o Cristo na sala Curuxeiras, a cargo do historiador Pedro Javier Rodríguez.

Tamén apuntou María Paz que este domingo 17 a Confraría da Soidade celebrará, ás 12.00h na capela da Orde Terceira, un acto institucional no que outorgará o patronazgo do Cristo da Boa Morte á agrupación local de Protección Civil. Será un recoñecemento ao seu labor, que contribúe enormemente ao desenvolvemento das procesións.

Domingo de Resurrección: os portavoces das confrarías da Mercé, Angustias e Soidade, destacaron tamén outra das grandes novidades desta semana Santa. O Gozoso Encontro que organizan conxuntamente as tres confrarías irmandadas cambiará de escenario, da praza da Constitución á de Armas. Variarán os percorridos das tres procesións que conflúen no Gozoso Encontro, por tanto, especialmente no caso da Soidade, que sairá da concatedral de San Xiao en lugar da Orde Terceira como era habitual. A procesión conxunta de regreso será pola rúa Real ata a Orde Terceira aínda que á altura da rúa Coruña, como xa se fixo o pasado ano, os confrades das Angustias retiraranse pola rúa Magdalena para regresar ao seu santuario.