Fotógrafos galegos reclaman un centro público galego para apoiar esta arte
A historia da fotografía en Galicia é clave para entender os cambios en país. Destacados representantes como Virxilio Viéitez - recoñecido polo seu enfoque documental e retratos íntimos da vida rural- ou Ksado -que capturou a esencia da Galicia tradicional- son fotógrafos de calado internacional. A medida que a tecnoloxía e a estética evolucionaron, outros artistas contemporáneos máis pegado á actualidade como Xurxo Lobato e Vari Caramés continuaron enriquecendo a escena fotográfica galega coa súa creatividade e perspectivas únicas. A pesar deste rico legado, o país carece dunha instiución específica para esta arte. Algo que agora, aproveitando a precampaña, os fotógrafos reclaman liquidar.
Máis dun centenar de persoas vinculadas coa fotografía, co comisariado e coa historiografía asinaron un escrito dirixido a todas as forzas políticas que se presentan ás eleccións do 18 de febreiro no que demandan a creación dunha institución que conserve, dixitalice, procese, organice, difunda e promova o estudo do patrimonio fotográfico de Galicia.
Un dos obxectivos, sinalan, é pór a disposición da actividade investigadora este patrimonio, tanto da historia da fotografía, como doutras múltiples disciplinas para as que pode ser de interese.
Así, explican que gran parte dos posuidores de arquivos aceptarían depositalos, cunhas cláusulas de cesión axeitadas, nun centro desas características, co que se evitaría a deterioración que, aseguran, en moitos casos están a sufrir.
Ademais, consideran que o interese pola fotografía histórica ten que ir acompañado dunha política axeitada de face a potenciar a creación fotográfica contemporánea.
Por iso, explican que lles gustaría que se tivese en conta esta reivindicación de creación dunha institución fotográfica que cumpriría os obxectivos de "reverter a situación actual, pondo en valor o patrimonio fotográfico e apostando pola fotografía como un medio de creación contemporánea".
Escribe o teu comentario