O xornalista Antonio Piñeiro recibe o Premio de Xornalismo Literario Carlos Casares 2023

O xornalista Antonio Piñeiro Feijóo recibiu este venres o Premio de Xornalismo Literario Carlos Casares 2023, "un xornalista de raza, histórico correspondente da Rexión e experimentado xestor cultural no Concello de Celanova", destacou o presidente do Parlamento, Miguel Ángel Santalices.

O presidente da Cámara galega mostrouse agradecido por poder formar parte da entrega dun galardón que "honra a memoria dun 'limiao' ilustre, Carlos Casares, un dos grandes nomes da literatura e da cultura galega de todos os tempos", que ademais foi un dos primeiros deputados do Parlamento.

"Que a Casa dos Poetas traspase fronteiras ou que o premio homónimo converteuse nun dos máis prestixiosos de Galicia non é casualidade, senón que é froito do traballo entusiasta de persoas comprometidas como Antonio Piñeiro", manifestou Santalices.

Ademais, lembrou o apoio do galardoado a iniciativas diversas "na procura dun maior achegamento ao mundo lusófono" que, engadiu, "nestas terras sentimos como parte de nós, como unha prolongación natural de Galicia".

Así mesmo, tal e como trasladou o Parlamento nunha nota de prensa, reivindicou que os avances tecnolóxicos "son sempre benvidos, pero, tanto no xornalismo como na vida en xeral, quizais se debería dedicar menos tempo ás redes e máis á conversación sosegada cos nosos interlocutores".

"Sería bo para a nosa saúde mental e tamén para enriquecernos a bagaxe persoal e profesional de cada un de nós", reflexionou.