A V Edición de O Son do Camiño será a máis madrugadora de todas arrincando o 30 de maio

Non hai quinto malo. O refraneiro dio e O Son do Camiño confirmarao en 2024 coa V Edición do festival santiagués, que prepara a que será sen dúbida a súa aposta máis ambiciosa. En só un lustro o festival converteuse nunha data ineludible para os máis festivaleros, que teñen reservado un lugar privilexiado na súa axenda para visitar o Monte do Gozo cada ano e dar a benvida ao verán e á tempada de festivais. Con todo, nesta ocasión terán que modificar os seus plans, porque O Son do Camiño adiántase para o ano que vén e non se fará de esperar. 

Na súa primeira edición O Son botou a persiana o 30 de xuño. Nas súas edicións anteriores estableceuse a mediados do sexto mes do ano, pero nesta ocasión adiantará a súa apertura ao 30 de maio. Desta forma, e durante tres días, a música non deixará de soar na capital galega os días 30, 31 de maio e 1 de xuño.

Non cambia nin a localización nin a proxección do "festival máis grande de Galicia", que tamén anuncia que "nos próximos días iranse anunciando as primeiras novidades desta próxima edición, que promete ser a máis grande e exitosa da existencia do evento até día de hoxe" despois dun 2023 no que 132.000 persoas gozaron deste gran evento cun público procedente de 40 países.

"O Son do Camiño non se entende sen a súa sinerxía con Santiago de Compostela. Durante os días nos que tivo lugar o festival en 2023 alcanzouse unha ocupación hoteleira do 100% na cidade e arredores, ademais de xerar un impacto económico único en Galicia. Ademais, a repercusión en medios de comunicación supuxo unha importante campaña de promoción exterior para o festival, para Santiago, para o Camiño e para toda Galicia", celebran os organizadores, Esmerarte Industrias Creativas e Bring The Noise. Haberá que estar moi atentos ás informacións que vaian achegando nas próximas semanas e co dedo no gatillo para cando saian á venda os abonos. Ninguén llo quere perder.