O Caudal Fest vende case dous terzos dos seus abonos nas primeiras 24 horas

A ritmo de marca. Así marchan as vendas no Caudal Fest. E non é para menos, porque a edición de 2024, a sexta do festival, promete ser a máis multitudinaria despois de anunciar un primeiro avance do cartel que inclúe a xigantes como Mikel Izal, Xenebras, Viva Suecia, Arde Bogotá, Siloé, Ladilla Rusa ou Carlos Sadness. Ante este cartelón, moitos xa se lanzaron a pedir o día libre do 20 ao 21 de setembro e sacar billetes para a cidade amurallada.

Desde a organización celebran que, aínda que faltan aínda once meses para que se abran as portas no Xardín do Pazo de Feiras e Congresos, xa voaron o 60% dos abonos en apenas unhas horas. Desde o luns vendéronse máis da metade dos abonos, e iso que aínda queda por anunciar a repartición de artistas por día, momento no que se porán á venda as entradas de día.

"A resposta dos fans do festival superou mesmo a gran acollida que o festival tivo na súa pasada edición e en apenas uns minutos os abonos vendidos xa se contaban por miles", festexan desde Bring The Noise, que compuxeron un festival que deixa aos fans satisfeitos e onde todos queren repetir. 

"A organización de Caudal Fest quere agradecer a todos os fieis asistente que volveron a depositar a súa confianza no festival e que queren ser parte, unha vez máis da última gran festa do verán", agregan, á vez que lembran que nas próximas semanas daranse a coñecer máis detalles da próxima edición, que vai romper todos os rexistros establecidos na cidade lucense.