O Camiño de Santiago Celta estrea a súa primeira mouteira en Irlanda

A Deputación da Coruña e a Asociación de Concellos do Camiño Inglés participaron esta semana na inauguración da primeira mouteira que sinaliza o Camiño de Santiago Celta en Irlanda, situado no paseo marítimo de Bray.

No seu discurso inaugural, o presidente da institución provincial, Valentín González Formoso, ha agredecido a aposta das autoridades locais irlandesas e da Camiño Society pola promoción desta ruta e destacou o compromiso da Deputación coa conservación e difusiónde "un legado histórico e un patrimonio cultural único e fundamental para Galicia e para toda Europa, o Camiño de Santiago".

Así mesmo, segundo destacou o organismo provincial nunha nota de prensa, o presidente subliñou os "vínculos históricos fortes e estreitos que unen aos pobos de Galicia e Irlanda desde as súas orixes".

"Cultura, historia, patrimonio, turismo e economía, son os alicerces da nosa aposta para potenciar ese vínculo secular que une a Irlanda e Galicia. Poden contar coa colaboración da Deputación da Coruña para facer que as nosas terras irmás estean aínda máis preto", afirmou Formoso.
 

A RUTA

Esta ruta comeza no paseo marítimo de Bray e finaliza na igrexa de St James, en James Street, no corazón de Dublín, onde a Camiño Society ten a súa oficina. Discorre por un espectacular camiño pola costa que ofrece magníficas vistas e interesantes lugares para visitar. Entre eles destacan a torre e museo de James Joyce en Sandycove , Dún Laoghaire, coa súa Vitoria Fountain, Blackrock's Martello Towers, Diving Bell e o Famine memorial en Liffey Quays, así como a catedral de Christ Church.

A ruta inclúe tamén a porta dedicada a St James en Dublín , pola que pasaban os peregrinos que partían cara a Santiago de Compostela e que estaba situada non lonxe do hospital fundado polo bispo da cidade ás beiras do río Liffey.

Aínda que a porta medieval foi derrubada no século XVIII, a actual conduce á emblemática fábrica de Guinness e conserva aínda o seu nome orixinal en recordo do seu pasado. Nesta porta os peregrinos poden hoxe en día selas os seus pasaportes antes de continuar até a igrexa de St. James e obter o selo final desta ruta e a Compostela do Camiño Celta.

Bray é a primeira ruta sinalizada cunha mouteira cunha frecha amarela que indica aos peregrinos a dirección a Santiago . A Deputación da Coruña e a Camiño Society pretenden sinalizar as nove rutas existentes en Irlanda nos próximos meses.