Máis de 1.700 raios caen sobre Galicia durante as últimas 24 horas

Galicia rexistrou 1.742 raios nas últimas 24 horas pola aproximación dunha dana polo oeste da comunidade que provocou que se perdese a influencia anticiclónica.

Así, varios puntos da comunidade galega están en aviso laranxa por tormentas que poden ir acompañadas de saraiba e por precipitacións acumuladas que poden chegar aos 30 mm nunha hora.

O aviso laranxa esténdese tamén a Ourense, concretamente ás zonas do Miño e do noroeste da provincia, onde se esperan precipitacións intensas que poderían alcanzar os 35 mm nunha hora.

Ante isto, a Xunta suspendeu a actividade deportiva federada no exterior dos concellos do centro e do sur de Lugo desde as 15.00 horas até a medianoite.

Ademais, polas fortes choivas recomendan circular con precaución e informar antes do estado das estradas, non atravesar zona alagada ou que poidan chegar a alagar e non aparcar preto dos ríos.

Até o momento os maiores rexistros de acumulado de precipitacións foron en Rodeiro (31.1 l/m2), seguido de Viveiro e Castro de Rei.

Para o luns espérase unha xornada de transición na que as baixas presións iranse afastando de Galicia. Así, haberá ceos parcialmente nubrados con choivas ocasionais, en xeral débiles, que remitirán cara á noite.