Falece un condutor ao impactar contra unha casa co seu vehículo en Outes

Unha persoa, A.F.V. de 30 anos de idade, faleceu e outra, I.C.P. de 26 anos, resultou ferida na mañá deste xoves despois de que o seu vehículo se saíse da vía e impactase contra unha vivenda da localidade coruñesa de Outes.

Segundo informa o 112 Galicia, os feitos ocorreron poucos minutos despois das 06.00 horas no lugar de Viro, en Roo e foi o dono do domicilio afectado o que alertou do sucedido.

Tal como explicaba, os dous ocupantes permanecían no interior do coche accidentado, un Renault Clio, pero un deles non respondía os intentos de contactar con el.

Até o punto desprazáronse os Bombeiros de Boiro e o GES de Noia, que excarceraron ao condutor e, a pesar dos esforzos dos servizos sanitarios que acudiron ao lugar, nada puideron facer para salvarlle a vida.

Pola súa banda, o outro ocupante do coche foi trasladado nunha das dúas ambulancias de soporte vital básico do 061-Galicia que se desprazaron ao sitio, ademais do persoal sanitario da PAC de Noia.