Concentración este luns para reclamar que non se peche o caso do asasinato de Yoel Quispe na Coruña

A familia do mozo peruano Yoel Quispe, apuñalado en 2023, convocou unha concentración para este próximo luns 10 de febreiro de 2025, ás 10:00 da mañá. Realizarase ante o xulgado situado na Praza de Tabacos na Coruña. Con este acto pretenden denunciar publicamente un asasinato cuxos responsables "non están a ser debidamente inculpados".

Os familiares aseguran contar con novas probas como unha gravación que demostra a presunta implicación de dúas persoas máis no ataque mortal contra Yoel Quispe. Segundo amigos e familiares de Yoel, estas probas foron ignoradas até agora o que para eles constitúe un acto de inxustiza e un atentado contra os principios de igualdade e dignidade.

O acto convocado para o luns 10 de febreiro busca chamar a atención e reivindicar ante as institucións o cumprimento de "o seu deber de xustiza". Nese sentido, sinalan a importancia de que o caso non caia no esquecemento e quede silenciado, algo que para os e as convocantes "só perpetúa a violencia e a discriminación".

Yoel Quispe perdeu a vida tras ser apuñalado durante unha pelexa nocturna na Coruña na madrugada do 24 de decembro de 2023. Polas redes sociais comezaron a circular imaxes do ataque. Nun dos vídeos, filmado desde un coche que esperaba a luz verde dun semáforo, pódese ver a un grupo de doce persoas enfrenándose a puñadas cun home no medio da calzada.