​Báñez propón calcular a pensión durante toda a vida laboral pola inestabilidade do emprego

O Grupo Popular propúxolle á Comisión do Pacto de Toledo ampliar o período de cálculo da pensión a toda a vida laboral de forma voluntaria, segundo adiantou este luns a ministra de Emprego e Seguridade Social, Fátima Báñez, nunha entrevista con TVE.

Esta medida beneficiaría a aqueles traballadores que cotizaron máis ao principio ou á metade da súa vida laboral pero non ao final da mesma, xa que, a efectos do cálculo da pensión, computaríase toda a carreira laboral e non só os últimos anos, o que melloraría a contía da prestación.

A ministra sinalou que algúns traballadores teñen cotizacións moi altas ao principio ou a metade da súa vida laboral, pero non ao final por mor de expedientes de regulación de emprego ou por poñerse a traballar por conta propia.

"Estamos a pensar que poida terse en conta, non os últimos anos de cotización, senón mesmo poder elixir durante toda a carreira laboral porque melloraría a pensión futura", explicou a ministra, que indicou que se trata dunha proposta do PP ao Pacto de Toledo.

"Veremos se ve a luz. Algunhas persoas ven con incerteza a súa pensión futura e nós queremos que a pensión sexa a mellor posible", subliñou a titular de Emprego.

A reforma de pensións de 2013 contemplaba a ampliación progresiva do período de cálculo da pensión de 15 a 25 anos. Para 2018, a contía da pensión calcúlase en función das bases de cotización dos 21 anos inmediatamente anteriores ao mes previo ao da xubilación. Para 2022, o período de cálculo será de 25 anos.

A reforma de 2013 tamén establece que os traballadores de máis idade expulsados prematuramente do mercado laboral, incluídos os traballadores autónomos, poden optar desde o 1 de xaneiro de 2017 pola aplicación dun período de 25 anos para o cálculo da pensión se iso lles resulta máis favorable.