A brecha salarial: unha problemática moi presente en Galicia

Unha de cada catro mulleres galegas (en torno ao 24,19%) traballaba a xornada parcial en 2016, mentres que o mesmo dato no caso dos homes era considerablemente inferior, do 6,6 % de acordo aos datos proporcionados polo Instituto Galego de Estatística (IGE)  nunha enquisa sobre os salarios do emprego principal.

Doutra banda e de acordo á o sexo dos asalariados, o 16,88% dos homes recibiu un salario inferior aos 1.203,79 euros mensuais en 2016, o 46,52% gañou entre 1.203,79 e 2.013,82 e o 36,60% percibiu máis de 2.013,82 euros. Entre as mulleres, a porcentaxe incluída no primeiro dos intervalos (menos de 1.203,79 euros/mes) sobe ata o 43,26%, detectando desta forma unha intolerable brecha salarial.

DATOS CON XORNADA PARCIAL E XORNADA COMPLETA

Así as cousas, en 2016, o 59,51% dos asalariados galegos con xornada parcial gañou menos de 710,69 euros mensuais, o 25,04% entre 710,69 e 1.013,65 euros e, finalmente, o 15,45% restante máis de 1.013,65 euros mensuais. Pola contra, entre os asalariados con xornada completa, a porcentaxe dos que ingresaron menos de 710,69 euros ao mes sitúase no 1,03%.

O colectivo de asalariados con xornada completa representaba en 2016 o 84,68% do total de asalariados en Galicia. O 18,80% destes traballadores ingresou menos de 1.203,79 euros ao mes, o 45,80% entre 1.203,79 e 2.013,82 euros e o 35,40% máis de 2.013,82 euros mensuais.

SEGUNDO O NIVEL DE ESTUDOS

En 2016, case a metade dos asalariados con estudos superiores ingresou máis de 2.013,82 euros ao mes; mentres que o 24,86% das persoas coa educación secundaria de segunda etapa completada ingresaba máis desta cantidade.

Esta porcentaxe sitúase no 11,24% para os que non completaron a segunda etapa da educación secundaria e no 12,15% para os analfabetos ou con estudos primarios. Por último,  o 43,75% da poboación con menor nivel de formación (analfabetos e estudos primarios) percibiu un salario inferior aos 1.203,79 euros.