Coristanco celebra este venres o pleno da moción de censura

Casa consistorial de Coristanco.

O Concello de Coristanco celebra este venres, día 25 de agosto, o pleno da moción de censura, presentada polo que ata esta semana era edil do PSOE, Abraham Gerpe, co apoio dos seis edís do PP.

Co pase de Gerpe ao grupo dos concelleiros non adscritos despois de que o PSdeG-PSOE o expulsase o mércores do seu grupo municipal a posibilidade de que a moción saia adiante é practicamente inexistente.

Os populares non prevén obter o apoio nin do grupo de Terra Galega nin da única concelleira do BNG, Laura Mariño, tal e como recoñeceron nas últimas horas desde o PP provincial, que dá por "pechado" o debate.

A pesar da defensa feita nos días previos polo portavoz municipal popular, Antonio Pensado, sobre a necesidade da moción, o PP, no seu comunicado, insistiu en que este partido "sempre cumpre coas leis e as institucións" e que non se dan "as condicións legais".

DISCREPANCIAS NO PSOE

Mentres, o xa ex edil do PSOE culpou do sucedido ao responsable da Agrupación Socialista en Coristanco, Aurelio Sánchez, persoa na que descargou tamén a responsabilidade das reunións que houbo co PP.

Tamén defendeu que actuou seguindo as decisións da militancia. Por iso, insistiu en que só era a militancia quen lle podía reclamar con "argumentos válidos" que retirase a xestión, algo que, segundo dixo, non se fixo.

POSICIONAMENTO DO PP

Pola súa banda, o portavoz municipal do PP e ex alcalde de Coristanco, Antonio Pensado, asegurou a Europa Press que acudirán ao pleno. "Imos ir e a ver que pasa", dixo ao ser preguntado polo feito de que non haxa os apoios suficientes para que saia adiante a moción.

Así mesmo, atribuíu ao concelleiro socialista a responsabilidade de retirar a mesma a pesar de que os edís populares tamén a asinaron. "Asinamos a proposta do PSOE nese momento porque reunía as condicións", sentenciou.

No marco destas discrepancias, o alcalde, Amancio Lavandeira, de Terra Galega, asegurou que os populares podían retirar a moción e preguntou por que non están expulsados do PP. "Tiñan que ser expulsados se actuaron ás costas do partido", argumentou.