Dous lugueses agrediron cunha arma de fogueo un mozo de 23 anos

Os agresores están identificados, pero non detidos.

A Policía Local de Lugo informou da instrución de dilixencias contra dous homes que agrediron un veciño cunha arma de fogueo na cabeza e propináronlle varios golpes, nun enfrontamento que se iniciou en redes sociais.

Segundo informa a Policía Local, a agresión ocorreu no barrio do Sacro Corazón, nas proximidades da Igrexa. O aviso, que foi recibido ás 17,18 horas do martes, informaba de que catro persoas estaban a agredir a un mozo. Denunciábase que portaban, supostamente, unha arma de fogo, porque se escoitou unha detonación e o agredido sangraba pola cabeza.

Os axentes desprazáronse ao lugar e localizaron un mozo desorientado, tremendo e aparvado, cun golpe na cara. Foi identificado como un veciño de Lugo, C.G.L., de 23 anos de idade. O agredido explicoulles aos axentes que momentos antes fora agredido e que utilizaran unha arma de fogueo contra el.

ANTECEDENTES

Os axentes iniciaron a continuación a pertinente investigación, podendo saber, a través de testemuñas presenciais que, nun primeiro momento, había catro mozos no altercado. Un deles portaba unha pistola de fogueo coa que encañonou o agredido na fazula, á vez que lle dicía "voute matar".

Despois, colocoulle a arma na cabeza e disparoulle, ocasionándolle lesións e provocando a súa caída ao chan, onde foi despois golpeado polos integrantes do grupo.

Amigos da vítima identificaron os autores da agresión como B.N.S. e o seu irmán J.N.S., veciños de Lugo. Segundo a información solicitada pola Policía, a agresión derivábase dun enfrontamento a través das redes sociais.

A Policía Local informou que un dos autores da agresión xa participara noutro altercado o luns na rúa Bispo Aguirre, onde tamén foi identificado e denunciado por un membro da Policía de Barrio por infrinxir a lei de Seguridade Cidadá por alterar a orde pública.

ASUNTO DE DROGAS

O subdelegado do Goberno en Lugo, Ramón Carballo, asegurou que a agresión puido obedecer a "un axuste de contas" por "un asunto relacionado con drogas".

Baséase para iso en que "as persoas que participaron nesa pelexa, todas elas teñen antecedentes penais relacionados con delitos e algún por tráfico" de sustancias estupefacientes.

O subdelegado aclarou que "os agresores están perfectamente identificados e están á espera de que se lles deteña e tomarlles declaración, e se fose preciso pasalos a disposición xudicial".