Bruno Gama confía en que esta tempada "as cousas saian"
O portugués destaca as boas sensacións desta tempada, que lle permiten manter a "ambición" consigo mesmo e o equipo.
Bruno Gama afronta a tempada con "ambición". Foto: RC Deportivo
O Dépor supera xa os 10.000 socios que renovaron os seus abonos para a próxima tempada. Unha campaña que Bruno Gama ve con "ambición de poder ofrecer cousas boas".
O portugués prefire deixar atrás a tempada pasada. "Non podo estar a pensar sempre na etapa anterior. Non foi o ano que me gustaría, pero a vida dun futbolista é así e hai que seguir traballando forte para que as cousas saian", declarou o xogador.
Bruno Gama está a deixar boas sensacións nos encontros desta pretemporada, pero considera que aínda é cedo para valorar o rendemento do equipo. Con todo, cre que "todas as fichaxes que chegaron son reforzos de calidade, bos xogadores. Agora seguro que se van adaptando e afacéndose cada vez máis ao equipo".
Tamén foi preguntado esta mañá por un hipotético regreso de Lucas Pérez. "Estariamos encantados de recibilo, todo o mundo coñece a súa calidade e a súa dimensión", comentou Bruno Gama.
Pola súa banda, Carles Gil volve padecer as mesmas molestias que o ano pasado lle impediron render en condicións. O xogador sofre de novo pubalxia, que cría superada tras o traballo extra realizado durante as vacacións e que o obrigará a someterse nos próximos días a un adestramento específico.
Escribe o teu comentario