Continúa a calor intensa no tramo sur do Miño e Valdeorras

Mantense o aviso amarelo por temperaturas que poden chegar a superar os 36 graos.

Redacción
| Sábado, 15 de Xullo de 2017, 11:12

Espéranse de novo temperaturas superiores a 36 graos.

As zonas do Miño das provincias de Ourense e Pontevedra, así como a comarca de Valdeorras manteñen este sábado o aviso amarelo por temperaturas de máis de 36 graos centígrados.

Segundo o Boletín de tempo meteorolóxico publicado por Meteogalicia, recollido por Europa Press, persisten as altas presións centradas no Atlántico e a entrada dunha masa de aire cálido procedente do sur peninsular.

Deste xeito, entre as 15,00 e as 21,00 horas deste sábado o aviso será amarelo nas zonas de Valdeorras, Miño de Ourense e Pontevedra.

Ademais, durante toda a xornada o vento no mar manterá o aviso de nivel amarelo na Costa da Morte e na costa coruñesa noroeste por vento do nordés con intervalos de forza 7.