PP e PSdeG pactan un acordo para regular a 'okupación' con En Marea e BNG en contra

|

Salayagookupacion


Os grupos parlamentarios de PP e PSdeG deron este mércores o visto e prace a un texto conxunto --que recibiu o voto en contra de En Marea e BNG-- para pedir ao Goberno que "mellore" o marco normativo que regula o delito de "usurpación de inmobles", así como que estas cuestións se diriman a través de xuízos rápidos.


O acordo entre ambas as forzas políticas tamén inclúe que as modificacións lexislativas posibiliten o desaloxo desde o inicio da instrución sumarial e que, nos casos de persoas en risco de exclusión que estean a habitar un inmoble que non sexa da súa propiedade, as administracións arbitren solucións para o seu realoxo.


A este pacto chegaron despois de que a deputada do PPdeG Paula Prado expuxese na primeira xornada do pleno unha iniciativa centrada nas "mafias" que "trafican e especulan" con pisos que detectan que están baleiros para esixir diñeiro aos seus propietarios a cambio da súa saída.


Con todo, a popular introduciu no debate os disturbios rexistrados en Santiago en dúas manifestacións en favor do colectivo okupa, que aproveitou para criticar ao alcalde compostelán, Martiño Noriega, polo seu "apoio" aos "violentos" que fixeron "un uso ilexítimo e ilegal" dun ben cuxo uso tardou "tres anos" en recuperar o seu propietario.


A súa falta de "escrúpulos" afeoulla Antón Sánchez, viceportavoz de En Marea, quen censurou que o PP se "preocupe" polas propiedades dunha "gran empresa ou un banco" pero non polos cidadáns "que non teñen vivenda ou son desafiuzados". Ademais, cargou contra a "violencia institucional" que implica non combater a exclusión social.


Por todo iso, o grupo rupturista presentou unha emenda para garantir que ninguén sexa desaloxado da súa vivenda, pero non foi tida en conta polo partido maioritario, que si se aveu a negociar a achega realizada polos socialistas.


PROPOSTAS REXEITADAS


En paralelo, os votos do PPdeG rexeitaron varias proposicións non de lei presentadas por PSdeG e En Marea que foron debatidas o martes.


En concreto, os populares opuxéronse a solicitar unha delegación da Fiscalía Anticorrupción para Galicia e a realizar un estudo sobre o rescate da AP-9, ambas as propostas do grupo rupturista; así como a reclamar un aumento de prazas públicas de gardería que permita eliminar a lista de espera, como demandaron os socialistas.

relacionada En liberdade os nove detidos en relación ás protestas okupas
relacionada Feijóo carga contra quen se pon "ao lado dos okupas" e "despreza a xente de ben"
relacionada Un detido e cargas policiais nunha protesta polo peche dun local okupa en Santiago

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress