Promoven a recuperación dos xogos tradicionais mediante unha guía online

O Consello da Cultura Galega lanza, en colaboración coa Asociación Galega do Xogo Popular e Tradicional, a primeira base de datos en liña que reúne recursos, publicacións e material achega do patrimonio lúdico tradicional galego.

Co obxectivo de promover a recuperación dos xogos populares galegos, a web xogospopulares.gal recompila documentación, cun servizo de préstamo bibliográfico e documental, pon en contacto a colectivos, centros de ensino, empresas e particulares interesados nesta materia, e mesmo permite coñecer os puntos nos cales facerte con xogos tradicionais.

Segundo explicou no acto de presentación a representante da devandita asociación, Zeltia Labraña, a web inclúe unhas 200 ligazóns e nela pódese atopar desde un apartado de documentación, con información sobre os xogos populares galegos; a unha guía de recursos musicais e unha biblioteca online.

A páxina "xa está operativa e aberta á colaboración de todo aquel que queira estar presente", mencionou Labraña. De acordo a ela, esta base de datos pretende "poñer en común toda a información sobre os xogos populares", ademais de servir como "unha guía de referencia para diferentes consultas sobre este tema". É, por tanto, "unha fonte aberta" que aglutina todo o referente á tradición lúdica galega.

O PROXECTO

O proxecto nace coa idea de "recoller este tipo de manifestación cultural galega", tal e como mencionou no acto a coordinadora da Sección de Patrimonio e Bens Culturais do Consello da Cultura Galega, Rebeca Blanco.

Neste sentido, "desde os anos 90, o máis importante é poñer en valor a cultura tradicional e, tras varias consultas que os particulares realizaban ao Consello, chegamos á conclusión de que tiñamos que facer algo", segundo apuntou Labraña.

PUBLICACIÓNS FUTURAS

Coa páxina en funcionamento, a representante da Asociación Galega do Xogo Popular e Tradicional comentou que teñen en mans a publicación dun libro que recompilará "estratexias de recuperación, un pouco da historia dos xogos e o punto no que se atopan agora mesmo".

Ademais, tamén se poderán consultar diferentes artigos sobre o tema, tanto de autores de referencia como de colaboradores que manteñen algún vínculo coa tradición lúdica galega.