Controlado o incendio de Narón tras calcinar 450 hectáreas

Medio rural informa ás 19:30 deste venres que o incendio rexistrado no concello de Narón, parroquia de Val --que segundo as últimas estimacións afectou a 444 hectáreas, das cales 325 son de monte raso e os 119 restantes de arboledo-- quedou controlado.

Segundo o ente autonómico, continúa estabilizado o lume de Oza-Cesuras, parroquia de Cis, que afectou a unhas 41 hectáreas e permanece controlado o incendio de Abegondo, parroquia de Vizoño, cunha superficie afectada de 46 hectáreas

OZA-CESURAS

Permanece estabilizado desde as 09,55 h. desta mañá o incendio de Oza-Cesuras, na parroquia de Cis, que comezou ás 02,09 h. Segundo as últimas estimacións afecta a unha superficie de 41 hectáreas. No seu control levan traballado 3 axentes, 11 brigadas, 9 motobombas, 2 pas e 2 helicópteros.

NARÓN

Ás 19,28 h. desta tarde quedou controlado o lume rexistrado onte ás 09,49 h. no concello de Narón, parroquia do Val. Segundo as últimas estimacións, a superficie afectada é de 444 hectáreas, das cales 325 son de monte raso e os 119 restantes de arboledo. No seu control levan traballado 10 axentes, 19 brigadas, 19 motobombas, 3 pas e 6 helicópteros. Tamén colaboraron efectivos da Unidade Militar de Emerxencias (UME).

ABEGONDO

Continúa controlado desde a 01,55 h. desta madrugada o lume en Abegondo, parroquia de Vizoño, tras comezar ás 17,49 h. da tarde de onte. Segundo as últimas estimacións, afectou a unha superficie de 46 hectáreas, das cales 38 son de monte arborizado e 8 de raso. Na súa extinción levan traballado 10 axentes, 9 brigadas, 5 motobombas, 3 pas e 1 helicóptero.