O Parlamento estudará utilizar o termo "feminicidio" para falar de violencia machista

A comisión non permanente para a igualdade e os dereitos das mulleres do Parlamento de Galicia volverá reunirse proximamente para tentar pechar un pacto galego contra a violencia machista e, ademais, decidir se corresponde utilizar o termo "feminicidio".

De todo iso deu conta en rolda de prensa a presidenta deste órgano, a deputada do PPdeG Paula Prado, quen avanzou que aos máis de 50 relatores que acudiron ao Pazo do Hórreo a pasada lexislatura uniranse outros expertos para analizar a conveniencia dese termo.

"Hai moitas posturas respecto diso", sinalou Prado, non sen obviar que tamén existe "debate" entre os propios grupos da oposición. Ata agora, o PPdeG sempre se negou á súa introdución na norma.

Prado tamén incidiu na súa vontade de que o pacto se aprobe "por unanimidade". "Para que toda a sociedade galega senta identificada", profundou, co obxectivo de poñer fin a esta "secuela social".