O audiovisual galego reivindica máis protagonismo feminino
O presidente da Academia Galega do Audiovisual, Carlos Ares, aproveitou a gala dos Mestre Mateo para reclamar "xustiza".
O presidente da Academia Galega do Audiovisual (AGA), Carlos Ares, fixo un chamamento este sábado para aumentar o número de papeis de mulleres protagonistas nesta industria. "É de xustiza", manifestou.
Durante a súa intervención, no ecuador da gala dos XV Premios Mestre Mateo, lembrou o recente estudo que se coñeceu no que se situaba a preto do 60 por cento dos actores e actrices que "non poden vivir da súa profesión" e fixo fincapé na repercusión maior no colectivo feminino.
"É necesario tratar de mellorar esta situación, é necesario traballar para evitar a precariedade. E isto non é algo que debamos descargar só nas administracións. É unha situación que debemos tratar de reverter entre todos e todas: administración, profesionais e empresas", abundou, antes de mostrar a disposición ao "diálogo" da academia e de reclamar que se desenvolva un estatuto do traballador da arte e da cultura.
De novo sobre a situación de discriminación das mulleres no sector audiovisual, salientou que non queren ter que celebrar "que haxa o mesmo número de mulleres directoras que homes". "Queremos que non sexa excepcional ter historias con mulleres protagonistas, que non sexa algo que resaltar", abundou.
Carlos Ares remarcou que a Academia "ten un firme compromiso coa igualdade, como non pode ser doutra maneira".
ESTATUTO DO TRABALLADOR DA ARTE
Na súa intervención, o presidente da AGA aproveitou para reclamar que se desenvolve o estatuto do traballador e traballadora da arte e da cultura, respecto do que subliñou a boa disposición de todos os grupos políticos.
"Un estatuto que poñería a profesionais de todos os campos da cultura á altura dos países da nosa contorna", destacou o presidente da Academia.
Carlos Ares remarcou que non están a pedir "privilexios, nin moito menos". "Só pedimos ter dereito ás mesmas prestacións por baixa laboral, enfermidade, maternidade, paternidade, desemprego ou xubilación que o resto dos traballadores do país", sentenciou.
Escribe o teu comentario