A sentenza de Nóos faise publica este venres

A sentenza do caso Nóos farase pública este venres e, por tanto, coñecerase o ditame do tribunal sobre a Infanta Cristina, para quen Manos Limpas pide oito anos de prisión, e sobre o seu esposo, Iñaki Urdangarin, para quen a Fiscalía mantén 19 anos e medio de cárcere.

Así, esta semana farase pública a resolución xudicial máis esperada do ano, despois de que o 22 de xuño o xuízo quedase visto para sentenza.

A maxistrada encargada de redactar a resolución, Samantha Romero, xa finalizou dita tarefa tras solicitar un período especial para asumir en exclusiva este traballo, que solicitou en novembro e que foi prorrogado ata marzo.

Cabe lembrar que a Fiscalía mantén os 19 anos e medio de cárcere para o ex duque de Palma, Iñaki Urdangarin, por non mostrar arrepentimento. Doutra banda, para o ex socio de Urdangarin, Diego Torres, a Fiscalía pedía 16 anos e medio, por presuntamente liderar unha trama empresarial coa que se apoderaron de ata 6,2 millóns de euros de forma ilegal.

Tras o xuízo, o fiscal anticorrupción Pedro Horrach non modificou a súa petición de cárcere despois de que estes dous acusados non mostrasen arrepentimento nin devolvesen a cantidade supostamente defraudada.

17 ACUSADOS PENDENTES DA SENTENZA DO CASO NÓOS

En total hai 17 acusados que esperan a resolución xudicial que se coñecerá este venres. Orixinalmente eran 18, pero o cuñado de Diego Torres, Miguel Tejeiro, foi absolto e pasou a ser testemuña no procedemento.

Para o ex presidente do Govern, Jaume Matas, rebaixou a petición de condena de once a cinco anos polos delitos relacionados cos contratos entre o Govern e o Instituto Nóos, tras aplicar o atenuante de reparación de danos xa que Matas entregou 900.000 euros da venda do seu palacete.

Tamén solicitaba 11 anos de cárcere para o ex vicealcalde de Valencia, Alfonso Grau; oito anos para o ex director xeral da Cidade das Artes e as Ciencias, Jorge Vela, a súa ex directora de xestión, Elisa Maldonado, e para o ex secretario autonómico de Turismo e Proxectos Estratéxicos da Generalitat Valenciana, Luís Lobón.

Para o sucesor de Vela, José Manuel Aguilar, pide seis anos de prisión; para a exconsejera delegada da Fundación Madrid 16 (que depende do Concello de Madrid), cinco anos e tres meses; e para o avogado Salvador Trinxet, que presuntamente axudou a planear a rede de evasión fiscla internacional, tres anos.

Para a muller de Diego Torres, Ana María Tejeiro, o fiscal pide dous anos de cárcere, así como para o excontable do Instituto Nóos, Marco Antonio Tejeiro.

Pola súa banda, José Luis 'Pepote' Ballester, ex director xeral de Deportes con Matas, e o ex xerente da fundación Illesport, Gonzalo Bernal, afrontan senllas peticións de dous anos de cárcere a substituír por 12.600 euros de multa.

Outros acusados do Govern, o ex director do Instituto Balear de Turismo (Ibatur), Juan Carlos Alía, e o exasesor legal desta empresa pública, Miquel Àngel Bonet, afrontan peticións dun ano de prisión, a substituír por multa no caso de Alía e de 4.050 euros no de Bonet.