O BNG asegura que Galicia tería "3.500 millóns máis" cun concerto económico

|

Anapontonbngconcertoeconomico


A portavoz nacional do BNG, Ana Pontón, defendeu este sábado que Galicia dispoñería de "3.500 millóns de euros máis" para "blindar os servizos públicos e mellorar a sanidade e a educación", así como para impulsar "políticas de modernización do país", cun concerto económico galego.


Durante unha xornada de traballo, a portavoz nacional do Bloque apostou, unha vez máis, por un novo modelo de financiamento para Galicia: "Un modelo de concerto económico que nos permita responsabilizarnos do noso presente e do noso futuro", subliñou a parlamentaria nacionalista, xusto antes de cargar contra o actual modelo, que ve "centralista".


Nesta liña, explicou que un concerto económico brindaría aos galegos a capacidade de controlar o diñeiro que pagan en impostos. "Isto significaría que, como mínimo, dispoñeriamos de 3.500 millóns de euros máis para blindar os servizos públicos", relatou.


De igual modo, fixo fincapé en que este concerto económico tamén permitiría á Comunidade dispoñer de instrumentos para aplicar unha fiscalidade "xusta", para que "pague máis quen máis ten". "Nós temos moi claro que Galicia é unha nación. Confiamos no potencial de Galicia e non compramos a falsa idea de que vivimos da solidariedade do Estado", remarcou Pontón, quen considera que esta comunidade "nada lle debe ao Estado" senón que, ao seu xuízo, é o Estado quen ten "unha débeda cos galegos e galegas".


A continuación, precisou que, se se analizan os datos oficiais do sistema de financiamento, pódese observar como na última liquidación feita pública --corresponde aos datos do ano 2014-- Galicia achegou ao Estado "máis de 11.000 millóns de euros" pola vía dos impostos. "Mentres, o Estado, polo sistema de financiamento, simplemente lle transferiu ao noso país 7.034 millóns de euros", denunciou a deputada do Bloque.


CUPO DE EUSKADI


Neste sentido, indicou que, se se ten en conta como se calcula neste momento a cota que paga Euskadi ao Estado, entón a achega que Galicia tería que facer ao Estado "sería de 630 millóns de euros". "De aí sáenos a cifra de que teriamos, para desenvolver o noso país, máis de 3.500 millóns de euros", calculou.


Estamos a destinar [...] aproximadamente 20 euros de cada 100 que gasta a Xunta a pagar débeda", lamentou, xusto antes de remarcar que, con este concerto económico, Galicia non tería que recorrer ao endebedamento, que ve "culpa" de Feijóo.


"Só desde unha mentalidade colonial se pode dicir que Galicia sae perdendo co concerto económico", aseverou Pontón, quen pediu a PP, En Marea e PSdeG que "non enganen aos galegos" sobre "a capacidade" que Galicia ten "como país" e que "non hipotequen" o futuro dos galegos e galegas seguindo "un modelo inxusto, discriminatorio e centralista".


ACABAR CO "ESPOLIO"


Así mesmo, apostou por acabar co "espolio", pois lamentou que hai moitas empresas que "viven dos recursos e do traballo en Galicia" pero, finalmente, "acaban pagando os seus impostos en Madrid".


A portavoz nacional tamén lanzou un dardo aos populares ao referirse á "suposta baixada de impostos" que proclama este partido: "O PP foi quen máis subiu os impostos e dunha maneira inxusta nos últimos tempos. Aí temos a subida do IVE, que pagan tanto unha persoa que está desempregada como un multimillonario", denunciou.


AEROPORTO DE SANTIAGO


Noutra orde de cousas, Ana Pontón, defendeu este sábado a proposta do Concello de Santiago a AENA para que o aeroporto da capital galega pase a chamarse Rosalía de Castro, Santiago de Compostela-Lavacolla. "Paréceme que é unha proposta que está ben", manifestou respecto diso.


Tras participar nunha rolda de prensa en defensa dun concerto económico galego, a parlamentaria nacionalista lamentou, con todo, que sexa AENA quen teña a última palabra. "(Sería) moito mellor que as competencias en materia de aeroportos fosen de Galicia e non do Estado", defendeu.


E é que, ao seu xuízo, o "lóxico" sería que a decisión de cambiar o nome ao aeroporto da capital galega se puidese adoptar en Galicia. "E non esperar se, desde Madrid, lles parece ben ou non", apostilou a tamén portavoz parlamentaria do Bloque.


"Vivimos no Estado máis descentralizado do mundo cando, nin tan sequera, podemos decidir o nome dos nosos aeroportos", ironizou, ante as risas dos militantes.

relacionada Galicia pode ter "a mesma calidade de vida que Dinamarca ou Finlandia"
relacionada A Xunta rexeita o concerto económico para Galicia e táchao de "pésimo negocio"

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress