A inflación en Galicia segue disparada por encima da media española a pesar da baixada de luz e combustibles o último mes
O conxunto das compras subiu case un 10% no último ano en Galicia, lixeiramente por encima da media de España, que non chega ao 9%.
Os alimentos encarecéronse moitísimo no último mes ao mesmo tempo que as subministracións como a auga e a luz baixaban grazas ás medidas do Goberno.
O índice de Prezos de Consumo (IPC) subiu en abril un 9,1% en Galicia, en comparación co mesmo mes de 2021, o que supón un crecemento oito décimas superior ao da media nacional.
Segundo datos publicados este venres polo Instituto Nacional de Estatística (INE), recollidos por Europa Press, os prezos volveron dispararse o mes pasado, tras o incremento do 10,5% rexistrado en marzo na Comunidade Galega, tamén por encima do 9,8% da media do total de España.
En comparación co mes anterior, en abril o IPC mantívose estable, mentres que no que vai de ano os prezos incrementáronse xa un 3,7%.
A nivel nacional, o Índice de Prezos de Consumo baixou un 0,2% en abril en relación ao mes anterior e recortou a súa taxa interanual 1,5 puntos, ata o 8,3%, polo abaratamento da electricidade e as gasolinas, sempre segundo os datos definitivos publicados este venres polo INE.
Estas cifras melloran os datos adiantados polo organismo a finais do mes pasado, que apuntaban a unha inflación interanual do 8,4% en abril e a unha taxa mensual do -0,1%.
A pesar de que o IPC segue en niveis inusualmente elevados, este indicador non baixaba tanto nun só mes desde hai máis de 35 anos, concretamente desde xaneiro de 1987. O de abril é, ademais, o primeiro descenso que experimenta a inflación tras dous meses de fortes ascensos, que levaron ao IPC para situarse en marzo no 9,8%, a súa taxa máis alta en case 37 anos.
Segundo Estatística, a moderación do IPC interanual ata o 8,3% débese, principalmente, aos descensos dos prezos da electricidade e os carburantes para vehículos persoais.
En cambio, os prezos dos alimentos rexistraron en abril unha taxa interanual do 10,1%, máis de tres puntos superior á de marzo, pola subida xeneralizada da maioría dos seus compoñentes, destacando o encarecemento da carne, o pan e os cereais, os legumes e hortalizas, e o leite, o queixo e os ovos.
Tamén subiron en abril os prezos dos servizos de aloxamento e da restauración e dos paquetes turísticos.
Sen ter en conta a rebaixa do imposto especial sobre a electricidade e as variacións sobre outros impostos, o IPC interanual alcanzou en abril o 9,3%, un punto por encima da taxa xeral do 8,3%. Así o reflicte o IPC a impostos constantes que o INE tamén publica no marco desta estatística.
No último ano, a calefacción, a iluminación e a distribución de auga encarecéronse un 35,2%; os aceites e graxas elevaron os seus prezos un 48,4% e o transporte persoal é un 13,2% máis caro polo maior custo dos carburantes.
Escribe o teu comentario