A Xunta ameaza con ir ante o Supremo se Moncloa non aclara como será a repartición dos Next Generation

María Jesús Lorenzana, conselleira de Emprego e Igualdade, informou esta mañá que de non ter unha resposta ao requirimento do Goberno de Galicia, este acudirá ao Tribunal Supremo para obter respostas.

"Imos esperar uns días e dar unha marxe ampla ao Estado para ver se responde e responde con certo criterio", sinalou Lorenzana. A vicepresidente terceira, Teresa Ribeira, dixo recentemente que non esperaba unha actitude "belixerante" da Xunta. 

Feijóo e Lorenzana | Foto: EP

A conselleira de Emprego e Igualdade, María Jesús Lorenzana, asegurou que a Xunta dará unha "marxe" ao Estado para que conteste o seu requirimento sobre a repartición dos fondos europeos 'Next Generation'. De non facelo, ratificou que acudirán ao Tribunal Supremo.

Unha vez cumprido o mes desde o envío do requirimento, reclamando outra repartición dos fondos ao considerar o actual "aleatorio" e "arbitrario", a conselleira precisou que esperarán "uns días" para ver se hai resposta.

"Non temos ningunha intención de facer ruído con isto", dixo a titular de Emprego, a preguntas dos xornalistas. Así, defendeu que a Xunta está a actuar "desde a máxima lealdade".

"Imos esperar uns días e dar unha marxe ampla ao Estado para ver se responde e responde con certo criterio", apuntou en relación ás demandas expostas pola Xunta a este respecto.

Con todo, a conselleira incidiu en que "transcorrido unha marxe prudencial" se non hai resposta ou un cambio de posicionamento por parte do Goberno si presentarán o recurso ante o Tribunal Supremo.

Lorenzana realizou estas manifestacións coincidindo coa visita ao Espazo Amizar, na Coruña, que estrea nova oficina de emprego.