Os hospitalizados de covid dispáranse pero hai sinais de que o pico de velocidade de alza de casos xa pasou

Os 414 novos positivos por PCR comunicados hoxe é a menor cifra do últimos cinco días e reflicte certa desaceleración no avance da sexta onda de covid nas últimas xornadas. 

Con todo, hai que ter en conta que o pasado luns os positivos foron 262. É dicir, a deceleración existe, pero desde unha perspectiva semanal aínda é modesta. Por exemplo, a velocidade de ascenso semanal dos positivos -que podemos deducir da razón de taxas- chegou a ser dun +46% semanal e agora baixou a +34%. 

O salto de +277 casos activos é o menor no últimos sete días e reafirma as esperanzas de que o pico de contagios non estea lonxe. Agora ben, parece que a avalancha de positivos empeza a trasladarse de maneira grave ao número de hospitalizados en planta. O +21 de hoxe é a peor cifra desde agosto e estamos xa en 114, a peor cantidade desde principios de setembro.

A incidencia acumulada semanal  sobe menos de catro puntos ata 112. É o salto menos grave no que levamos de segunda metade de novembro. De acordo a o novo semáforo covid aprobado onte polo Ministerio, este índice está en nivel de risco medio.

A incidencia acumulada a 14 días crece bastante máis, 9 puntos hoxe, ata 168.  Continuamos en risco medio cuns valores similares aos de principios de setembro.

O dobre da incidencia a 7 días (224) é moito maior que a incidencia a 14 días (168).  pois que na última semana houbo máis positivos que na penúltima. 

Cantos positivos máis? A razón de taxas é de 1,34 , por tanto na última semana houbo un  34 % de positivos más que na penúltima.

A curva dese índice, que nos mostra a velocidade de avance ou retroceso dos diagnósticos desde unha perspectiva semanal, é esperanzadora. O 20 de novembro tocamos teito cun aumento de 46% e desde entón tendemos á baixa, con freadas significativas nos dous últimos días. Parece que a máxima velocidade de subida da sexta onda é cousa xa do pasado.  

A taxa de positividade onte foi de o  3,2% . A media semanal sobe, pero case nada, de 4,13% a 4,15%. Seguimos en risco baixo neste indicador segundo os criterios do semáforo oficial de alertas. Non hai escaseza de PCRs, o SERGAS está a realizar de media máis de 11.000, cando a mediados de outubro non llebaba aos 1.800 diarios.

EVOLUCIÓN DOS CASOS ACTIVOS

O total de infectados ascende hoxe un 5,8%, que é  a menor subida en mes e medio. Isto loxicamente axuda a que a media semanal, índice moito máis relevante que o cambio diario, complete outro pasito na boa dirección, caendo   de   9,6% a  9,4%.  

Tende á baixa desde fai xa oito días. Este é o indicador máis firme de que o pico da sexta onda está próximo. 

En termos absolutos, as porcentaxes de hoxe equivalen a un ascenso de +277 . O total é de  casos activos é de 5.056 . 

DATOS POR ÁREAS

Vigo (97) e  Ourense (113) son outra vez os distritos que máis positivos comunican hoxe.  Por vez primeira en bastante tempo Vigo non supera o centenar de diagnósticos. Ourense segue sendo o distrito cunha peor situación, tanto na cantidade de casos activos en proporción ao seu tamaño como en presión hospitalaria. 

Son 5 xa os pacientes críticos en Ourense e 37 en planta, cifras nada despreciables para a capacidade do SERGAS alí teniendo en cuenta ademais que, no mellor dos escenarios posibles, aínda falta case un mes para que a presión sobre os hospitais empece a baixar.

Máis datos a nivel municipal e de distrito de o SERGAS nuns minutos noutra noticia de Galiciapress.

CONCLUSIÓNS

Con estas cifras sobre a mesa, pódese inferir que:

• A pandemia continúa crecendo a unha velocidade alta. A boa noticia é que esa velocidade, sendo alta, non é tan brutal como o foi a principios da semana pasada.
• Os sinais de que o pico de positivos está a se achegar son cada vez máis numerosas. A derivada da curva da media móbil a sete días do cambio casos activos leva oito días á baixa -historicamente o mellor índice para estimar o rumbo actual do coronavirus-, a curva da media semanal taxa de positividade tamén parece que pode empezar a baixar e a gráfica da razón de taxas mostra que o cume da sexta onda parece que é  xa  cousa do pasado.  

  

  
  

• Con todo, esta onda desenvólvese en circunstancias inéditas. Xamais houbo tanto vacinados pero xamais houbo este nivel de virus con restricións tan pouco relevantes. Por iso, a incerteza estatística é maior, esta onda non ten porqué comportarse necesariamente como as anteriores. Así, mentres que as análises de Galiciapress indican que o pico está preto o SERGAS estima que aínda faltan dous ou tres semanas.
• O presidente da Xunta cualificou onte de estable a situación en Galicia. O vicepresidente dixo que as cifras "non están a ser boas". Estaría ben que os gobernantes lanzasen unha mensaxe máis coherente. Os números son os que son, non existe a estabilidade á que se referiu o presidente, por moito que os niveis galegos sexan mellores que os españois ou europeos. Sen restricións nada impedirá que Galicia acabe como outras partes de Europa. A nosa vantaxe é que temos máis marxe para implementalas. De feito, o SERGAS xa empezou a deslizar a posibilidade de limitar todos os eventos en interiores con persoas de pé.