As vítimas das gravacións da Maruxaina "esperanzadas e alegres" pola reapertura do caso

As mulleres vítimas das filmacións durante a festa da Maruxaina, imaxes que acabaron en páxinas web de contido erótico, pediron no seu día a inhabilitación do xuíz que decidiu arquivar a denuncia. 

"Tiñamos moito medo de como ía repercutir na sociedade que este caso queda impune", sinalan.

Protestas polo caso da Maruxaina | Foto: EP

"Con esperanza e alegría", así recibiron na asociación Mujeres en Igualdade de Burela o auto polo que a Audiencia Provincial de Lugo ordena que se reabra a investigación sobre as gravacións de mulleres ouriñando durante a festa da Maruxaina, celebrada en 2019 en San Cibrao (Cervo); imaxes que foron incorporadas a páxinas web de contido erótico, algunhas delas con acceso de pago.

Os maxistrados conclúen nun auto notificado este xoves que se viu comprometida "a intimidade dun grupo de mulleres", polo que decreta que se investigue "sobre quen e como realizou as gravacións".

A Sala revoga, por tanto, a decisión de arquivar o caso adoptada polo maxistrado do Xulgado de Instrución número 1 de Viveiro, que resolveu inicialmente a investigación e, xa en setembro deste ano, desestimou os recurso de reforma presentados polas vítimas.

"Estamos moi esperanzadas coa noticia", asegurou a presidenta de Bumei --asociación que compareceu na causa--, Mary Fraga, que recoñeceu que nun primeiro momento "tiñan moitas dúbidas" do final deste proceso "visto como se seguían os feitos desde o xulgado".

"Tiñamos moito medo de como ía repercutir na sociedade que este caso queda impune", sinalou Fraga, recelosa de que a falta de castigo para este feito puidese dar pé a outros semellantes. "Non podemos dar marcha atrás nos dereitos das mulleres", aseverou.

Fraga destacou a "alegría" coa que comprobaron que si se está cumprindo o Pacto de Estado contra a Violencia de Xénero, como demostra a reapertura do caso da Maruxaina.

"De momento, conseguimos o que pediamos: unha investigación, xustiza. Non pedimos máis nada que ser libres, saír á rúa sen ter que ir mirando cara atrás por se alguén nos está gravando. Oxalá isto non se volva a repetir", comentou a presidenta de Bumei.