Abanca conta con medio centenar de oficinas menos en só un ano con especial impacto no rural galego

A entidade, que presume de grandes beneficios que levantaron ao seu presidente, Juan Carlos Escotet, a ser a quinta maior fortuna de España, segue co seu plan de pechar sucursais en Galicia.

En só un ano, a entidade bancaria conta con 50 oficinas menos na comunidade, deixando así a miles de clientes sen o seu serivicio.

Abanca | Foto: EP

Abanca conta cun total de 437 oficinas en Galicia ao peche do mes de setembro, o que supón medio centenar menos que as 487 que tiña operativas na mesma data un ano antes.

Na información remitida pola entidade á Comisión Nacional do Mercado de Valores (CNMV) con motivo da publicación os estados financeiros nos nove primeiros meses de 2021, Abanca sinala que conta cunha rede de 631 oficinas operativas en España, das cales 437 están situadas en Galicia e as outras 194 no resto do país.

En comparación co informe remitido á CNMV a peche de setembro de 2020, prodúcese un descenso de 50 oficinas en Galicia. En cambio, aumentan en 19 as sucursais que ten en España fóra da comunidade galega (eran 175 hai un ano), aínda que nos últimos meses Abanca realizou compras como a de Bankoa e a rede española de Novo Banco.

Pola súa banda, entre a información achegada á CNMV figura que os gastos de persoal quedan en 274,9 millóns de euros, o que supón 10 millóns menos (-3,5%) que os preto de 285 millóns no terceiro trimestre de 2020. Aquí, a principal redución correspóndese con soldos e salarios, que pasan de 212,5 millóns a case 202 millóns.

Ao 30 de setembro de 2021, a persoal medio# do grupo ascende a 6.092 persoas (142 máis que os 5.950 empregados dun ano antes). Con todo, dentro dese global, o persoal destinado ao banco redúcese a 5.387 traballadores (eran 5.503 en setembro de 2020).

Xunto a isto, refírese diferente información contable xa coñecida, como que Abanca rexistrou un beneficio de 209,8 millóns de euros durante os nove primeiros meses de 2021, o que supón un incremento do 46% respecto a un ano antes. O pasado martes, a entidade financeira abonou preto de 67 millóns de euros en dividendos entre os seus accionistas.