Masiva resposta cidadá á xuíza que usa vivir na "Galicia profunda" como razón para quitar unha custodia

|

Unha polémica sentenza do Xulgado de Primeira Instancia número 7 de Marbella califica a Muros de ser "Galicia profunda" e utiliza a localidade como un dos argumentos para retirarlle a custodia do seu fillo a unha nai galega.


A xuíza, María Belén Ureña Caraz, argumenta que Marbella, "máis cosmopolita", ofrece unha mellor contorna para criar ao menor. As reaccións de políticos, escritores e demais personalidades non se fixeron esperar.


Niu00f1vos familias parque

Nenos e familias nun parque | Foto: EP


De Muros a Santiago de Compostela hai unha hora en coche. A ría de Muros-Noia é, ademais, unha das zonas máis puxantes no que a turismo se refire, como se puido comprobar o verán pasado. As calas de Porto do Son, o Pazo do Tambre ou a vila medieval de Noia son unha boa mostra de todo o que pode ofrecer a zona. Con máis de 20.000 habitantes só entre Muros e Noia, a priori a localización non se parece moito á "Galicia profunda" coa que unha sentenza do Xulgado de Primeira Instancia número 7 de Marbella apoia a decisión de arrebatar a custodia do seu fillo a unha nai galega, residente nun municipio da citada ría, en favor do pai do menor, que vive na Costa do Sol.


Evidentemente, este non é o único elemento do escrito para concluír esa decisión, pero con todo si resulta o máis rechamante e o que suscitou máis críticas ao considerar que a crianza pode ser mellor nunha cidade "máis cosmopolita" como Marbella no lugar do rural galego. De feito, vivir nesta comarca da provincia da Coruña "non supón múltiples posibilidades para o adecuado desenvolvemento da personalidade dun neno e para que creza nun ambiente feliz", argumenta a maxistrada, María Belén Ureña Caraz.


O número de colexios, a atención sanitaria que ofrece a cidade andaluza e as oportunidades laborais son outros aspectos polos que a xuíza considerou que a mellor opción era conceder a custodia ao pai e non á nai que reside nunha "pequenísima poboación na Galicia profunda" que está "lonxe de todo" -a unha hora da capital galega, insistimos-. Claudia Traba, avogada da afectada, anunciou que presentará unha queixa formal ante a comisión disciplinaria do Consello Xeral do Poder Xudicial pola actitude da xuíza e solicitará a nulidade do xuízo.


"ESCANDALOSA", "CLASISTA", "GAÑANA", "MACHISTA"...

A noticia provocou un aluvión de reaccións de galegos e galegas que consideran inxusta a decisión por eses argumentos, ademais de persoas procedentes doutros puntos da España Baleirada que denuncian que as contornas rurais son ideais para os nenos, ademais de que é xusto o que necesitan estas zonas cada vez máis baleiras.


Entre as reaccións atopamos a do deputado no Congreso polo BNG Néstor Rego, que considera "escandalosa" a sentenza, á que tacha de "galegofóbica, clasista e unha violación de dereitos".



"A xustiza española dá noxo", criticou. Ana Pontón, líder do BNG, afirmou que sentenzas así "non se poden permitir" pola "dignidade de Galiza, desa muller e dese neno". Os tamén nacionalistas Mercedes Queixas e Xabier Igrexas expresáronse en idénticos termos.




Desde a bancada socialista as críticas non son menos duras. Valentín González Formoso, alcalde das Pontes, presidente da Deputación da Coruña e rival de Gonzalo Caballero polo liderado do PSdeG, destacou os "prexuízos, a soberbia e o descoñecemento" da sentenza, ademais de reivindicar o orgullo "das nosas raíces".



Pablo Arangüena, número dous de Caballero, recalcou que se lle "desen a elixir" entre unnha infancia en Marbella ou na "Galicia profunda" elixiría esta segunda opción. "E non lle viría mal a parte da xudicatura pasar nela un verán ou dous…", propón. Laura Seara, de Allariz e secretaria de Estado de Igualdade no goberno de José Luis Rodríguez Zapatero, reprochou unha sentenza "clasista, gañana e machista".



Con máis retranca tomouno o parlamentario socialista en Bruxelas Nicolás González, que puxo como exemplo "escenas" da súa "Galicia profunda", onde os nenos corren o risco de ser devorados por lobos e xabarís. "Con éxito podes chegar a ser cacique, meiga, crego ou, con sorte, narco", ironiza. A concelleira en Compostela Navia Rivas subliñou que o neno corría o risco de ser "demasiado feliz" en Galicia.




Ata sindicatos como a 'Union de Pequeños Agricultores', vinculado a Unións Agrarias, expresaron o seu malestar por este "ultraxe ao medio rural", mentres o secretario xeral de Podemos Galicia, Antón Gómez-Reino, limitouse a recalcar a "profunda incultura" do edicto.



As LETRAS RESPONDEN

O escritor Manuel Rivas, de cuxa pluma saíron obras crave da literatura galega e castelá como 'O lapis do carpinteiro' ou 'Que me queres, amor?' tamén reaccionou á sentenza: "Nunca pensei que o cosmopaletismo hispano chegaría tan lonxe". Berta Dávila, autora de 'Illa decpeción' ou 'Carrusel', mostrouse sorprendida porque "o lugar exacto onde pasei sete anos da miña infancia e adolescencia é a Galicia Profunda", ademais de ser, en consecuencia "un inferno para as criaturas". A paisaxe non parece dicir o mesmo. 



Tamén o escritor e xornalista Manel Loureiro pronunciouse respecto diso, lembrando que Muros ten preto de 9.000 habitantes e resistiuse a dar a súa opinión sobre a xuíza por medo "a que me metan unha querela". O lucense Luís Pousa, tamén escritor, preferiu tirar da broma: "E iso que a xuíza non sabe que na Galicia profunda bañamos aos bebés nunha marmita de Estrella Galicia".



Doutra banda, twiteros e influencers, como o divulgador e mariscador

Rogelio Santos Queiruga, o historiador Suso Vila, ou a conta 'A maruxinha ou A Prosoviética'

falaron do tema, sempre ofrecendo un punto de vista distinto e divertido, talvez herdanza do que significa crecer na Galicia profunda.








Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress
CLABE