'Noites do Porto' chega para quedar con Califato 3/4, Derby Motoreta's, Bad Gyal, Xoel López e Anxo Stanich

O peirao de Batería da Coruña será o escenario dos concertos porgramados para o 29, 30 e 31 de outubro.

A intención do Concello da Coruña é que esta sexa a primeira de moitas edicións para que o festival sexa "unha referencia a nivel nacional".

Cartel de Noites do Porto | Foto: EP

O peirao de Batería da Coruña será o escenario dun novo festival, Noites do Porto, entre os días 29 e 31 de outubro. Esta será a primeira edición, pero o obxectivo é que dure "moito máis tempo" e sexa "unha referencia a nivel nacional".

Así o explicou durante a súa presentación o seu director, Héctor César Marcos, que estivo acompañado pola alcaldesa da Coruña, Inés Rey, e o director da Axencia de Industrias Culturais, Jacobo Sutil.

O director de Noites do Porto destacou que "este non é un festival de indie máis". Héctor Marcos sinalou que este proxecto é "máis global" e busca chegar a "máis público" cun carácter "aberto".

Pola súa banda, Inés Rey expuxo que este festival "simboliza" a integración do porto na cidade. A rexedora coruñesa ha encomiado "a diversidade" do cartel, que segundo afirmou, "axudará á recuperación do sector servizos e do comercio local", ao atraer numerosos visitantes.

Jacobo Sutil mostrou o compromiso da Xunta coa cultura e dixo que tiñan que "acompañalos no camiño". O director da AGADIC aplaudiu o labor de Estrela Galicia apoiando este festival e outros proxectos culturais, xa que é "unha oportunidade para difundir os seus valores".

O CARTEL

O festival terá un cartel con distintos xéneros musicais e arrincará o día 29 de outubro coa actuación de Califato 3/4. O grupo de electrónica realizará a súa primeira actuación na Coruña e presentará o seu primeiro disco. Ese día tamén actuará o grupo de rock andaluz Derby Motoreta's Burrito Kachimba.

O día 30 será a quenda do gran referente feminino da música urbana, Bad Gyal. A artista catalá realizará o seu último concerto en Noites do Porto e non volverá virar ata o verán de 2022, polo que será a última oportunidade de vela en directo ata dentro de varios meses.

Pechará o festival un referente da cidade herculina, Xoel López. O director de Noites do Porto dixo que a súa elección "non era casual". O artista coruñés "é o que mellor representa a cidade fóra dela", segundo afirmou Héctor Marcos, e fará un repertorio exclusivo para o festival. O día 31 tamén se subirá ao escenario outra músico clave no indie nacional, Anxo Stanich, que presentará por primeira vez en directo o seu novo disco.

As entradas pódense adquirir nas plataformas habituais e terán un prezo de 25 euros para o día 29, e de 35 euros para os días 30 e 31. Os concertos poderanse gozar de pé con máscara e gardando a distancia de seguridade. Haberá un aforo inicial de mil persoas que se podería ampliar se cambian as restricións. En caso de choiva está prevista unha carpa transparente para poder ver os concertos e as vistas do porto coruñés.