Enquisa CIS Xullo 2021: O Bloque sobe, Podemos baixa e as dereitas estatais suman máis que as esquerdas

A suma de PP, Vox e Cidadáns pasa por vez primeira a porcentaxe da suma de PSOE, Podemos e as súas confluencias. Con todo, mentres a esquerda ten nacionalistas como o BNG cos que alcanzar a maioría, as dereitas carecen de socios potenciais cos que pactar.

Nestor Rego é o actual único deputado nacionalista galego nas Cortes

O BNG conta cunha estimación de voto do 0,8% para a celebración dunhas novas eleccións xerais, segundo o barómetro do Centro de Investigacións Sociolóxicas (CIS) correspondente ao mes de xullo.

Este barómetro de xullo do CIS supón un incremento dunha décima para o Bloque Nacionalista Galego respecto ao 0,7% que rexistraba o mes anterior.

Igualmente, vai á alza en intención de voto directo, xa que pasa do 0,5% de xuño ao 0,8% de xullo. De feito, neste punto o Bloque sitúase por encima de partidos como PNV e Pacma (0,7% en ambos os casos).

SOBEN OS SOCIALISTAS?
Pola súa banda, o CIS volve situar ao PSOE na cabeza, e mesmo aumenta a súa vantaxe sobre o PP a 5,2 puntos, tras a remodelación do Goberno levada a cabo por Pedro Sánchez.

En concreto, calcula para os socialistas un apoio do 28,6%, 1,2 puntos máis que o mes anterior, mentres que o PP caería medio punto, do 23,9% ao 23,4%. A distancia entre ambos crece, por tanto 5,2 puntos, fronte á de 3,5 puntos de xuño.