Confinamento perimetral para A Pobra do Caramiñal, Mos e Lobios desde este sábado

O comité clínico que asesora á Xunta na xestión da pandemia acordou manter o nivel máximo de restricións en Lobios (Ourense), e incorporar coas mesmas limitacións á localidade coruñesa da Pobra do Caramiñal e Mos, o que supón que estes municipios quedarán sometidos a peche perimetral desde o sábado.

O nivel máximo de restricións, nos termos decretados pola Xunta ata o momento --dado que require o aval xudicial-- tamén inclúe toque de queda entre as 23 e as 6 horas. Tanto A Pobra como Mos estaban en nivel alto na última reunión do comité clínico, pero a súa situación empeorou.

Agora, no nivel alto de restricións para os municipios que incrementaron a súa incidencia ou se manteñen en taxas elevadas estarán Ribeira, Ordes, Moraña, Ponte Caldelas e Viveiro. Nos concellos neste nivel só está aberta a hostalería nas terrazas e a un 50 por cento.

Ademais, as medidas do nivel medio, con hostalería aberta ao 30 por cento en interiores e ao 50 por cento en terrazas, permanecerán desde o sábado nunha ducia de municipios das catro provincias: O Barco de Valdeorras, Moaña, Ponteareas, Cambados, Bueu, Boiro, Rianxo, Cee, Xove, Cervo, Vilalba e Monforte.

No resto dos municipios galegos, estarán vixentes as restricións fixadas no nivel medio baixo. Todas as medidas entrarán en vigor, segundo informou Sanidade, ás 00,00 horas do sábado 29 de maio.