O Goberno de Galicia chama de novo a Moncloa para alcanzar un pacto de estado por Ferrol

O escenario económico que se presenta na cidade departamental e toda a comarca pola falta de traballo en Navantia e o peche doutras industrias deixa á zona nunha situación moi difícil. 

Feijóo, desde Ferrol, insistiu nun pacto de estado para a cidade: "A proposta foi remitida por min, persoalmente, a semana pasada ao presidente do Goberno".

Feijóo en Ferrol | Foto: EP

O presidente da Xunta, Alberto Núñez Feijóo, volveu a aludir este venres á proposta de pacto de estado por Ferrol que lanzou a Xunta e pediu a implicación das administracións, co foco no Goberno central.

"A falta de traballo en Navantia está a crear unha enorme incerteza nas empresas auxiliares e para o propio estaleiro público", recalcou, en declaracións aos medios en Ferrol, para engadir que, en consecuencia, "é necesario unha aposta por parte de todas as administracións públicas".

"A proposta foi remitida por min, persoalmente, a semana pasada ao presidente do Goberno", indicou, antes de engadir que o vindeiro martes se trasladará esta iniciativa cun centenar de actuacións ao resto de administracións, como Deputación da Coruña, o conxunto de concellos de Ferrolterra, Eume e Ortegal.

"Tamén empresarios e sindicatos, todos xuntos, estamos chamados a buscar unha fórmula de novos proxectos, de proxectos tractores, e de investimento público nestas comarcas", concluíu.