Covid municipios: Preocupante subida en Santiago, Vigo rebota e Cambados é o que máis mellora

Mañá hai reunión do Comité Clínico do SERGAS. Os expertos da Xunta normalmente valoran impoñer as restricións máximas (peche perimetral, clausura hostaleira, etc.) cando un municipio supera os 250 de incidencia semanal, en negro no mapa.

Hoxe só quedan dous concellos no peor dos niveis posibles, Santiso e Lobios, despois de que Pontedeva baixe hoxe a nova normalidade ,ao non sumar ningún positivo nunha semana.

As comarcas de Arousa (con Cambados e Vilanova en risco extremo), O Barbanza (coa Pobra en risco extremo e Ribeira en risco alto) e Chantada (con Dozón, Chantada e Rodeiro en risco alto) están entre as que peores niveis de covid-19 soportan.

Os concellos actualmente confinados son Cambados, Laza e Padrón. En principio, todos teñen opcións de que a Xunta lles levante as restricións máximas. Sobre todo Laza, que mellorou tanto que xa está en niveis de nova normalidade. Posiblemente tamén se libre do confinamento Padrón, que aínda está en risco medio. 

Algo máis complicado teno Cambados, aínda que non imposible. A semana pasada o seu cómputo a sete días superaba os 30 e co descenso de hoxe ponse en 21, aínda que a incidencia semanal segue sendo de risco extremo.

Municipios cuxo cómputo de positivos no últimos sete días sobe hoxe respecto ao mesmo cómputo onte:

• Boiro +1
• Culleredo +1
• Nigrón +1
• Santiago de Compostela +2
• Lugo +2
• Vilagarcía de Arousa +2
• Ourense +3
• Marín +3
• A Pobra do Caramiñal +4
• Mos +5
• Vigo +7

Relación de concellos cuxo total de positivos na última semana baixa hoxe respecto a ese total onte:

• Cambados -6
• Oleiros -5
• Pontevedra -5
• Ribeira -4
• Ames -2
• Ordes -2
• Lobios -2
• Redondela -2
• Ferrol -1

A evolución dos positivos en todos os concellos de Galicia pode consultarse no buscador desta táboa:

COMPARATIVA DE CIDADES

O alcalde de Santiago acaba de pedir prudencia aos seus veciños ante o ascenso das cifras na capital. Non lle falta razón a Xosé Sánchez Bugallo. Basta follear a gráfica da cidade a 14 días para decatarse do rápido empeoramento desde o 8 de maio, precisamente o día do fin do estado de alarma. Desde entón, a incidencia bisemanal case se duplicou.

Compostela empezou a semana pasada como a cidade con menores niveis semanais e vai camiño de superar a Pontevedra e converterse na segunda urbe con máis nivel de positivos a sete días.

A 14 días só Vigo mantense cunha incidencia superior a 100, que en todo caso dálle para manter a súa incidencia bisemanal en nivel de risco medio, do mesmo xeito que o resto de cidades, salvo Ferrol que é, con bastante diferenza, a cidade con mellores niveis.

O repunte das cifras de hoxe de Vigo podería ter que ver co segundo cribado anunciado no Porto de Vigo entre os compañeiros de traballadores que deron positivo a semana pasada. A curva a 14 días de Vigo non ten un rumbo claro, pero en todo caso os altibaixos actuais son moderados, polo que a tendencia xeral é de certa estabilidade.

EVOLUCIÓN DOS CASOS ACTIVOS POR ÁREA

Santiago segue sendo a área con peor comportamento nas últimas xornadas, ata o punto que hoxe supera a Pontevedra como terceiro distrito con máis casos activos. As áreas con mellor evolución recente son A Coruña, a piques de baixar dos 600 casos activos, e Ferrol, que aguanta desde o 10 de maio por baixo dos 100.

En canto aos casos activos a nivel galego respecto onte, tras cinco xornadas consecutivas en descenso, aumentaron lixeiramente ata os 2.805, que supoñen 16 máis, ao haber máis contagios (116) que altas (98), ao que se engaden dous falecidos.

Por áreas sanitarias, os casos activos descenden na da Coruña e Cee (-21) e aumentan nas de Vigo (+15), Santiago e Barbanza (+11), Pontevedra e O Salnés (+7) e Lugo (+4), mentres que se manteñen nas de Ourense e Ferrol.

Deste xeito, a de Vigo segue á cabeza con 843 infeccións activas; seguida da da Coruña e Cee, con 605; Santiago e Barbanza, con 435; Pontevedra e O Salnés, con 433; Ourense, con 223; Lugo, con 179; e á cola mantense Ferrol, con 87. 

ÚLTIMOS DATOS POR ÁREA

Vigo volve ser o distrito que máis positivos achega, 31 de 105 do total galego. Con todo, en proporción ao seu tamaño, son peores as cifras de Santiago (20) e Pontevedra (24).

A nivel galego, os novos contagios de Covid-19 subiron lixeiramente a 116 no conxunto da Comunidade, despois de arrincar esta semana con 107, o que supón nove máis.

Do total, 105 foron positivos confirmados por PCR nas últimas 24 horas, deles 31 na área de Vigo; 24 na de Pontevedra e O Salnés; 20 na de Santiago e Barbanza; 14 na da Coruña e Cee; seis na de Ourense; outros seis na de Lugo; e catro na de Ferrol. 

HOSPITALIZACIÓNS POR ÁREA SANITARIA

Segundo os datos actualizados na mañá deste martes pola Consellería de Sanidade con rexistros ata as 18,00 horas deste luns, seguen 37 pacientes Covid ingresados en UCI en Galicia e 139 noutras unidades de hospitalización. E hai 2.629 en seguimento nos seus domicilios.

Por áreas sanitarias, a presión hospitalaria aumenta lixeiramente nas de Vigo e Santiago-Barbanza; baixa nas de Ourense e Lugo; e mantense nas da Coruña-Cee, Ferrol e Pontevedra-O Salnés.

En concreto, na de Santiago e Barbanza soben a catro as persoas ingresadas pola Covid en UCI --una máis-- e a 21 as que se atopan noutras unidades --unha máis--; mentres que na de Vigo seguen 10 en críticos e aumentan a 40 as doutras unidades --unha máis--.

Mentres, na de Ourense queda un paciente Covid en UCI --uno menos-- e descenden a 13 os doutras unidades --uno menos--; e na de Lugo seguen dúas en críticos e redúcense a sete os doutras unidades --uno menos--.

Pola súa banda, na área da Coruña e Cee continúan nove pacientes Covid en UCI e 35 noutras unidades; e na de Pontevedra e O Salnés seguen nove en críticos e 20 noutras unidades.

Tamén na de Ferrol non hai cambios con respecto á xornada anterior, con dous pacientes Covid ingresados en UCI e tres noutras unidades de hospitalización.