Ferido grave un operario ao caer desde unha estada preto da praia de Coira, en Porto do Son

O afectado trataba de arranxar un portal e necesitou a asistencia dun helicóptero medicalizado.

A nave viuse obrigada a aterrar no areal de Portosín, preto do lugar no que se produciu o suceso. 

Helicóptero en Porto do Son | Foto: @HelicoSantiago

Un operario sufriu feridas de consideración despois de caer dunha estada que utilizaba para arranxar un portal en Porto do Son (A Coruña).

O 112 Galicia tivo coñecemento dos feitos ás 17,15 horas, a través de Urxencias Sanitarias de Galicia-061, que mobilizou un helicóptero medicalizado para atender ao traballador ferido.

Ademais, desde o Centro Integrado de Atención ás Emerxencias (CIAE) 112 Galicia solicitouse a intervención dos axentes da Garda Civil e da Policía Local e dos membros da Agrupación de Voluntarios de Protección Civil de Porto do Son.

Segundo a información recollida no 112 Galicia, o suceso produciuse nas proximidades da Praia de Coira, en Portosín.