Rebotan os positivos semanais de covid en Galicia por vez primeira desde o pico da terceira onda

O primeiro sinal claro do fin da melloría aparece hoxe. A incidencia acumulada semanal do coronavirus en Galicia crece por vez primeira desde o 25 de xaneiro, cando alcanzou o seu máximo da terceira onda.

Un cambio de tendencia que é pequeno, pero significativo, porque a incidencia acumulada semanal non é produto das cifras dun día, constrúese con cifras de sete xornadas.

Este repunte sementa dúbidas sobre a conveniencia de seguir aliviando as restricións. Ademais, demostra unha vez máis que canta máis mobilidade e menos restricións, máis contagios.

Os 116 novos diagnósticos por PCR comunicados poden parecer poucos e efectivamente sono se os comparamos cos 1.515 do 22 de xaneiro. Con todo, son suficientes para que a incidencia semanal creza de 33 a 35 positivos por cada 100.000 galegos.

O rebote aínda non se nota na incidencia acumulada a 14 días, indicador moi pouco proclive a mostrar cambios de tendencia ata que xa son moi notables. Por agora segue á baixa, descende de 86 a 83, pero a súa caída é cada vez menos pronunciada.

A taxa de positividade tamén nos dá unha mala noticia. A media semanal rebota un pouco, sobe de 1,8% a 1,9%. Seguen sendo valores moi bos, propios do nivel de "nova normalidade" no indicador de alertas estatal, pero é preocupante que a cifra de onte, 2,3%, sexa a peor do últimos nove días.

EVOLUCIÓN DO RITMO DE CAMBIO DE CASOS ACTIVOS

A cantidade de infectados segue caendo, pero ese descenso perde cada vez máis e máis velocidade. En termos porcentuais cae un 2,6% hoxe, a peor cifra desde o 2 de febreiro. Ampliando o plano , como sempre debemos facer, á perspectiva semanal a caída é do -5,5%, aínda moi notable pero xa lonxe do -6,6% de finais de febreiro. 

Todas estas cifras pintan un panorama preocupante. O Sergas pode esperar que os casos activos sigan caendo uns días  pero, de seguir repuntando os indicadores de novos positivos, a derivada de casos activos irase aproximadamente cada vez máis rápido a cero. Cando supere o cero e alcance valores positivos poderemos falar dunha cuarta onda de coronavirus en Galicia. 

CONCLUSIÓNS

Con todas estas cifras sobre a mesa, podemos concluír que:

• A pandemia xa non está a retroceder en Galicia, polo menos desde o punto de vista semanal. Nos sete último días gañou terreo, polo menos no campo de batalla das infeccións.
• O contraataque por agora é dun calibre pequeñísimo pero non por iso despreciable. Como se aprecia na súa gráfica, a incidencia acumulada semanal non é un indicador que cambie de rumbo facilmente. Cando o fai, adoita indicar que unha onda empeza a marcharse ou que outra onda empeza a chegar.
• Débese este repunte ao alivio das restricións da Xunta? Sen dúbida é un dos factores que contribúe. Por exemplo, Vigo e Ourense,  dous das áreas sanitarias onde primeiro relaxouse as limitacións foron as dúas primeiras en sufrir repuntes de casos activos.
• Que grao de gravidade ten o repunte? Por agora, pequeno e é imposible saber como evolucionará. Fernando Simón recoñeceu onte que eran probables pequenas ondulaciones nos próximos días. Do que non hai dúbida é de que canta máis mobilidade haxa, máis contagios tamén haberá.

ÚLTIMOS DATOS POR ÁREAS

Os 23 novos novos positivos detectados no distrito de Vigo non parecen moitos, pero son suficientes para que o total de casos activos creza alí ata os 610 desde os 606 de onte.  É a primeira vez que soben en Vigo desde o 31 de xaneiro. No resto de áreas, segue baixando. 

Excelente a cifra de Ourense, con só 2 novos diagnósticos, pero é a única área que hoxe consegue baixar dos 10 diagnósticos, barreira que en días anteriores non superaron varias áreas sanitarias. Máis datos a nivel de área sanitaria e de concello nuns minutos en Galiciapress.