Os hostaleiros poden montar as terrazas ao 100% pero deben inutilizar a metade, lembra a patronal

A advertencia da Xunta de incumprimento de normas nas terrazas desata a alarma entre algúns representantes do sector

Desde Lugo piden que as normas sexan máis claras e que non obriguen aos establecementos para "abrir a perdas"

Cidadáns na terraza dun bar de Lugo ao 12 de decembro de 2020/ EP

O presidente da Asociación Provincial de Empresarios de Hostalería de Lugo, Cheché Real, demandou "máis claridade" na normativa de apertura deste tipo de establecementos tras o alivio de restricións no marco da pandemia pola Covid-19.

MONTALAS TODAS E INUTILIZAR A METADE
Así, explicou que o pasado venres, cando se aliviaron as restricións en zonas como Lugo, "houbo algún problema de interpretación da norma". "E nós xa cursamos correos ese mesmo venres para dicir que había que ter o cento por cento das mesas montadas (terrazas) e inutilizadas ao cincuenta por cento", comentou, unha circunstancia que xa se corrixiu o sábado.

Cheché Real protestou porque "saen normas, DOG, boletíns, que saen dun día para outro e hai que interpretalas". "E nós vimos interpretando normas e boletíns desde o 14 de marzo", abundou, do pasado ano.

CAÍDA DE INGRESOS
Tamén chamou a atención polos aforos interiores, ao 30 por cento, e así destaca que "se hai un establecemento con tres mesas só pódese usar unha e se nesa mesa hai unha soa persoa e senta non pode entrar máis".

Por iso, Real advertiu que "son cinco veces menos de ingresos do que se podía ter". "Isto a nós economicamente non nos soluciona nada, todo o contrario porque hai establecementos con aforos importantes que teñen que abrir a perdas", lamentou.

ADVERTENCIA
"O que vemos é que hai moita ilusión por parte dos empresarios e da cidadanía e encima a fin de semana acompañou o tempo. Temos que coidarnos moito, non se trata de multas ou sancións económicas, o problema é da contaminación porque se soben os casos de transmisión volven pechar a todos e isto non se pode permitir porque sería catastrófico", concluíu.